Hai unes selmanes salía a la venta Da-yos caña. El tiempu y el contestu d’una banda de Rock Astur, la obra cola que Xune Elipe algamó’l II Premiu «Yolanda Huergo», convocáu pola Asociación Grana. Nesti llibru, el músicu y activista percuerre a lo llargo de 140 páxines el tiempu y el contestu asturianu y internacional qu’influyeron nel nacimientu de Dixebra, y esti miércoles 24 de xunu va ser la presentación oficial del trabayu. A les ocho la tarde el café-llibrería xixonés Toma3 acueye esti actu nel que tamién participa l’escritor Francisco Alvarez, biógrafu del míticu grupu de rock astur.
Nesti llibru tóquense cuestiones de calter históricu, social, cultural o llingüisticu, entellazaes con anécdotes o referencies biográfiques; entemeciéndose asina campos lliterarios y temáticos estremaos como la historia, política, música o biografía. La crisis del petróleu nos años 70, la llegada de la democracia formal, el nacimientu del asturianismu contemporáneu, la reestructuración del sector industrial, la llegada del punk, los medios alternativos de comunicación, el descubrimientu del nacionalitarismu llibertariu, l’impactu de les drogues, l’ambiente urbanu, los conflictos llaborales, la instauración del réxime autonómicu, el procesu de normativización del asturianu… son dalgunes de les cuestiones presentes na obra que dan les claves de por qué surde una formación musical como Dixebra y qué repercusión va tener too ello na so ideoloxía y mensaxe.
La publicación -editada por Trabe– tamién inclúi abondo material gráficu (cartelería, semeyes, pegatines, etc) y munchu d’él ye inéditu. Na presentación d’esti miércoles, Xune Elipe y Francisco Álvarez van afondar en toles cuestiones presentes nesta obra que ganó’l premiu d’ensayu que fai alcordanza de Yolanda Huergo, activista xixonesa finada hai 6 años, y que completa la bibliografía qu’Elipe tien dedicada a la historia, les músiques y les lluches populares.
Suscríbite a les nuestres novedaes
