Hai unos meses l’Ayuntamientu de Xixón aprobó la iniciativa de la Sociedá Cultural Xixonesa na que se pidía que se-y dedicara un espaciu n’El Natahoyo a Igor Medio, músicu y dibuxante orixinariu d’esti barriu que finó, xunto col so compañeru Carlos Redondo, el 24 de xunu de 2006 cuando diben camín de Barcelona pa dar un conciertu de Felpeyu. Dos décades dempués de la so perda, Xixón va tener una cai n’alcordanza d’esti artista y esti sábadu 27 a les doce’l mediudía va facese l’actu d’inauguración, nel que va haber una breve actuación de Felpeyu y la intervención de l’alcaldesa, Carmen Moriyón.
L’actual cai Palafox -que da entrada al paséu Naval Azul, abiertu a la ciudadanía a finales del pasáu añu-, va camudar el nome pol d’esti artista xixonés que «ye una figura fundamental pa entender la cultura, non namás pola so contribución musical y plástica, sinón tamién pola so capacidá pa dignificar la identidá d’un barriu y la memoria colectiva«, como desplicó l’Ayuntamientu de Xixón nel comunicáu col que confirmaba l’homenaxe. Dende’l Conceyu tamién sorrayen qu’Igor Medio, como miembru fundador de Felpeyu, «supo entemecer tradición y vanguardia dando voz a una xeneración comprometida cola so tierra y la so realidá«. Amás, destaquen que «el so venceyu col barriu d’El Natahoyo marcó fondamente la so trayectoria; un entornu portuariu y industrial que moldeó la so sensibilidá artística y la so conciencia social«.
Dende esti sábadu 27, esti queridísimu artista va tener pa siempre un espaciu que lu homenaxea nel so barriu, sumándose esta a otres iniciatives na so alcordanza como’l ciclu de folk de cámara que lleva’l so nome; o’l festival n’Alcordanza, qu’esti va volver a facese’l 25 de xunetu con un conciertu de más de seis hores de duración na Plaza Mayor de Xixón na qu’actúen Felpeyu, Llan de Cubel, Hermanos Castro, Radio Fox, Kactus Jack y Jaguares de la Bahía.
Suscríbite a les nuestres novedaes
