El vienres entamó una edición nueva de la Semana Negra, pernomáu eventu xixonés dedicáu a la lliteratura nel que la música tamién tien dalgo d’espaciu na programación. Esti añu ye la estaya Las Noches la que ta protagonizada por cuestiones rellacionaes cola música a traviés de la proyección de documentales, charres y conciertos. La presencia femenina nella ye «residual y desiquilibrada», como denuncia l’Asociación de Muyeres de la Industria de la Música (MIM) nun comunicáu y, por ello, esti colectivu unvió una carta formal a la Conceyalía de Cultura de Xixón y Conseyería de Cultura pa treslladar el so esmolecimientu.
«La cuestión plantegada nun afecta a la llibertá de programación artística de la organización del festival, sinón a la responsabilidá de les alministraciones públiques que lo financien«, sorraya MIN nel so comunicáu faciendo mención a la llexislación autonómica y llocal qu’afiten la igualdá ente muyeres y homes como principiu de l’actuación pública nel ámbitu cultural.
«Existen artistes y bandes asturianes con muyeres al frente con una trayectoria que fai imposible atribuyir esta situación a una falta de talentu existente. La escasa de muyeres nel cartelu nun reflexa la realidá del sector, sinón el desinterés en comprometese con una programación paritaria», denuncien dende MIM.
D’esta manera ye como l’asociación pide Ayuntamientu y Principáu que «adopten, nel ámbitu de les sos competencies, les midíes oportunes pa que la financiación pública destinada a la Semana Negra desenvuélvase de forma coherente colos principios d’igualdá recoyíos nel ordenamientu xurídicu, favoreciendo una representación equilibrada nun festival que constitúi dende va cuasi cuatro décades ún de los acontecimientos culturales más relevantes d’Asturies».
Suscríbite a les nuestres novedaes
