Va trés décades existió en Xixón un grupu de rock alternativu llamáu Púa. Formáronlu los músicos Juan Luis García Menéndez, Alejandro González González y Xurde Pérez Viguera y daquella grabaron una maqueta. El proyectu nun guañó pero, dempués de 30 años y gracies a les tecnoloxíes nueves, la formación recupera esa maqueta y publícala en toles plataformes musicales. Dientro de los temes hai ún n’asturianu, ‘La Solana’ que musicaliza un poema de Fernán-Coronas «Padre Galo».
«Daquella grabamos una maqueta con seis cantares. Grabóse nun cuatro pistes, ente Xixón y Brieves (Valdés), de la meyor manera que pudimos o supimos d’aquella. Anque teníemos más cantares, el proyectu nun acabó de salir. Agora, trenta años dempués, aprovechando les ferramientes actuales basaes na intelixencia artificial, decidimos recuperar aquella maqueta y meyorar notablemente la so calidá«, desplica Juan Luis García Menéndez.
D’esta manera ye como La Púa -tuvieron que camudar el nome porque yá hai otra formación col nome orixinal d’esti grupu- respetó «la melodía, la estructura, la voz y los riffs principales» de los temes, «pero’l saltu na calidá del soníu ye realmente bien grande», esclaria García.
Agora los cantares tán publicaos en plataformes musicales en forma de singles y ente ellos rescampla ‘La Solana’. Trátase d’una musicalización del poema La Incla Interior del pernomáu escritor Fernán-Coronas «Padre Galo» (1884-1939) con un soníu rockeru contundente que lleva a sentir una obra d’esti autor -del que yá adaptaron testos otros proyectos folk y llíricos- nun estilu nel qu’enxamás sonara enantes.
Suscríbite a les nuestres novedaes
