La Asociación de Intérpretes de la Canción Asturiana (AICA) impulsa esti branu un programa con trés actividaes que xiren alredor de l’asturianada, con una clara intención: afondar na so esencia, reforzar la tresmisión del patrimoniu musical y siguir abriendo camín a nueves voces dientro del xéneru. La propuesta combina formación, divulgación y evaluación artística en distintos conceyos d’Asturies.
El ciclu entama cola prueba d’aptitú d’AICA, que se va celebrar el 22 de xunetu en El Berrón (Siero), a les 18:00 hores. Nesta cita, los aspirantes a cantadores y gaiteros tendrán que demostrar les sos capacidaes interpretatives y el so conocimientu del repertoriu tradicional. Nel casu del cantar, cada participante presenta cinco pieces de distintos estilos, de les que’l xuráu escueye dos pa la so interpretación final, una d’elles acompañada a la gaita y otra en solitariu. Tamién se valoran aspectos como l’afinación, la calidá vocal o la dicción. Pela so parte, los gaiteros han amosar solvencia técnica, afinación y conocimientu de les tonalidaes tradicionales, amás d’una correcta función d’acompañamientu.
La programación continúa’l 24 de xunetu en Panes (Valle Baxu de Peñamellera), cola xornada formativa “L’asturianada ye prestosa”, que va tener llugar na sala polivalente del conceyu a partir de les 18:00 hores. Nesta sesión van participar nomes destacaos del ámbitu de la música tradicional, como Fernando Entrialgo, que va exercer de ponente, xunto con Sergio Agüeros como “lleenda viva”. Completen el cartel la cantadora Cristina Sánchez, el cantador Álvaro Fernández, el representante de la xente mozo Mario González y el gaiteru Ricardo Soberado. La xornada preséntase como un espaciu pa escuchar, sentir y deprender, combinando testimonios, interpretación y reflexón sobre la tradición.
La última de les actividaes va celebrase’l 31 de xunetu en Benia d’Onís, nel Centro Municipal Polivalente “Hnos. Álvarez Marcos” (Tullidi), tamién a les 18:00 hores. Nesti casu, la propuesta caltién la mesma filosofía divulgativa, con Fernando Entrialgo al frente y la participación de Ismael Tomás como lleenda viva, xunto colos cantadores Manuel Arenas y Lorena Corripio y el gaiteru Moisés Martínez. La cita busca siguir afondando na tresmisión oral y musical de la asturianada, averando al públicu a les sos formes más auténtiques.
Suscríbite a les nuestres novedaes
