El festival Gastrosónica va celebrar una nueva edición esti fin de selmana nel Parque de La Llera de Les Arriondes, con una programación que xune música, gastronomía y actividaes alredor de lo que la organización define como el festival del son, el saber y el sabor del conceyu de Parres.
La música asturiana va tener un protagonismu especial na programación. Una de les actuaciones más destacaes va ser la de Corquiéu, que va xubir al escenariu del Gastrosónica’l vienres 11 de setiembre dende les 20:30 hores. La formación ribeseyana ye una de les bandes con mayor trayectoria dientro de la música folk asturiana y la so presencia nel festival suma una nueva parada a un mes de setiembre especialmente intensu pa la formación, que tamién va ofrecer un conciertu especial en Cangues d’Onís el día 18.
La programación musical del Gastrosónica va cuntar tamién con una propuesta pensada especialmente pa la reciella. Alicia Álvarez va presentar Kikirikikí, el so proyectu musical n’asturianu pa neñes y neños. La propuesta, enmarcada dientro del PequeGastrosónica, parte del llibru-discu del mesmu nome y cuenta con canciones que falen de los sentimientos, la imaxinación o los mios al traviés d’histories protagonizaes por animales y otros personaxes.
La música va ser parte d’una programación más amplia na que’l Gastrosónica va volver xuntar gastronomía, cultura y ociu. Con actividaes y propuestes pa públicos bien diferentes, el festival va convertir Les Arriondes nun puntu d’alcuentru durante unos díes nos que’l sabor y la música van volver dir de la mano.
Suscríbite a les nuestres novedaes
