El próximu mes d’ochobre celébrase en Bilbao una edición nueva de BIME, l’alcuentru más importante de la industria musical que se celebra nel Estáu español, y nel qu’Asturies tien per primer vez presencia oficial institucional. Gracies a la collaboración que fai la Conseyería de Cultura, Política Llingüística y Deporte con esti eventu van facer un showcase Axolotes Mexicanos pa representar a la escena fecha equí y tamién pónense a disposición de les persones interesaes un descuentu del 50% pa la entrada d’esti eventu. Hai 20 disponibles y quien quiera aprovechales tien que contactar con eventos@turismoycultura.asturias.es.
BIME ye un alcuentru internacional de la Industria Musical que se fai dende 2013 en Bilbao y, dende 2022, tamién en Botogá (Colombia). Ye ún de los congresos musicales más importantes de la industria musical del Estáu español, con miles d’asistentes de tol mundu y nel qu’hai ponencies, formación, conciertos, esposiciones profesionales, alcuerdos de negociu, etc.
Hai unos meses la Conseyería de Cultura, Política Llingüística y Deporte abrió una convocatoria dirixida a artistes d’Asturies pa participar nel BIME 2026. Tres de recibir más de 50 propuestes, la organización del eventu escoyó a Axolotes Mexicanos pa ufrir una actuación curtia (showcase) énte profesionales de la industria musical, dientro de la programación de BIME Live. D’esta forma, van poder amosar el so trabayu a programadores, promotores, públicu y otros axentes del sector.
MUSICASTURIANA.COM participó como asiste ente 2022 y 2025 col oxetivu de medrar en conocimientos rellacionaos cola industria musical gracies a les distintes charres, conferencies y talleres; de visibilizar la música del país y crear oportunidaes de negociu con otros axentes culturales; y de conocer les polítiques musicales que tán desendolcando distintes alministraciones públiques.
Suscríbite a les nuestres novedaes
