Una nueche de rockangaita: Asturtralla torna a casa 30 años dempués

Nun yera un conciertu cualquiera. Asturtralla volvía a Avilés, la ciudá que los vio nacer en 1994 y onde, tres décades dempués de los sos primeros pasos nel panorama del punk-rock n’asturianu, sigue calteniendo viva la mesma actitú combativa que nos sos inicios. La cita, na Sala Paseo Malecón, tenía por ello daqué de regresu a casa y de xuntanza ente vieyos conocíos.

Dempués del so retornu a los escenarios y de la publicación de nuevos trabayos y versiones nos últimos años, la banda avilesina llegaba a la villa del Niemeyer presentando Fame, Sidra y Rockangaita, el discu que recueye bona parte del material que foi asoleyando dende 2023 y que confirma que’l proyectu ta mui vivu.

 Y eso notóse dende la mesma apertura de puertes. A les nueve la nueche, hora d’apertura, yá había un bon garrapiellu de xente esperando l’entamu d’una nueche marcada pola camaradería, los collacios y los realcuentros. La Sala Paseo Malecón foi hinchíndose poco a poco nun ambiente familiar y cercanu, coles banderes y cartelos cedíos por «Asturies Insumisa» decorando’l recintu con mensaxes como “La tortura nun ye cultura” o “La vivienda ye un drechu” y anunciando que la reivindicación y la música diben volver dir de la mano.

A eso de les 21:30 hores abrió la nueche Involución, banda avilesina encargada d’entamar el doble cartelu. Nel repertoriu tuvieron un pesu importante los temes de Sadikos (La Maketa), publicada en 2024, con cantares como ‘Sadikos’, ‘Dama de la ciudad’ o ‘Borregos’.

El públicu recibió’l conciertu con cierta contención nos primeros minutos, anque la sala ya taba casi enllena, entovía quedaba espaciu llibre cerca’l escenariu. Sicasí, col pasu de los cantares la respuesta foi medrando y l’ambiente foi caléciendose. Involución xugaba en casa y eso notabase, la bona presencia n’escena y el coleguéu ente los músicos y col públicu yera apalpable.

La banda acompañó’l repertoriu con una puesta n’escena llamativa y que dió muncho xuegu pa poner al públicu a tonu. El cantante salió vistíu como un monitor d’aeróbic y, a lo llargo de la actuación, foi alternando distintos complementos y disfraces, ente ellos una mázcara de monu. En ‘Mira ke 45’ sumáronse a los coros dos moces del públicu, nunu de los momentos más celebraos de la actuación. Tres más d’una hora de conciertu, Involución despidióse del escenariu dexando una sala yá más activa y preparada pa la llegada d’Asturtralla.

Cuando llegó’l turnu d’Asturtralla, la Sala Paseo Malecón presentaba un llenu completu. El llocal, asitiáu enfrente de la ría d’Avilés, colgara’l cartelu de «sold out» pa una cita que tenía muncho de regresu a casa pa una banda nacida precisamente na villa.

El conciertu abrió con una parte instrumental que permitió presentar a la formación actual del grupu enantes de la llegada de Xelu. El veteranu cantante xubió entós al escenariu y, ensin más preámbulos, entamó con Kutxo, dando comienzu a un repertoriu que foi repasando bona parte de la trayectoria recién y histórica de la banda.

Nos primeros cantares l’ambiente na sala yera más bien pausáu. El públicu, formáu en gran midida por collacios, familiares y siguidores de llargu percorríu, siguía’l conciertu con atención dende les les tables, viviendo esti conciertu con ganes y animando al grupu. El segundu tema yera ‘Dios salve al rei‘, la versión n’asturianu del clásicu de Sex Pistols, qu’enseguida foi reconocida por bona parte de los presentes y dexó escuchar les primeres voces acompañando al grupu.

Tres ella fueron cayendo los temes a caraperru, ‘Insumisión‘, siguieron con ‘Zona Muerta‘, el míticu cantar que taba yá nel recopilatoriu del añu 1997 de discos l’Aguañaz, Saca-yos la llingua y ún de los temes colos que volvieron nel 2021, ‘Oficialidá’. Un conciertu que foi ganando temperatura poco a poco, tanto sobro l’escenariu como ente un públicu que precisó d’un tiempu pa soltase y entamar a movese.

El conciertu siguió entemeciendo temes del so últimu discu como Culiebra Venenu con otros que ya esplublizaron al entamu d’esta segunda etapa como Fame. Ún de los temes más conocíos de la nueva etapa de la banda ye Les seis de la Suiza, que na versión grabada cunta cola collaboración del grupu mozo Ochobre y que tien un estribillu mui pegadizu y col que’l públicu entamó a animase.

Siguieron ente temes propios y versiones con Salve y Nun somos Nada (dambes versiones de La Polla Records, la segunda cola traducción al asturianu). El tema propiu Zarreu, dedicáu a la mina de Degaña que volvió a les noticies nel añu 2025 pola muerte de 5 trabayadores que taben sacando carbón ensin que la empresa cuntara con llicencia pa ello. Y ya llegando a los últimos temes siguieron con Ye un crimen, versión del grupu Eskorbuto y tema mui celebráu y cantáu polos presentes.

Anunciando Xelu que quedaben 3 cantares namás por tocar, llegó’l turnu del tema ‘Asturies‘ y del dedicáu al colectivu Asturies Insumisa, col mesmu nome y col que’l grupu aprovechó pa dar les gracies poles banderes y pancartes que decoraben l’espaciu asina como por la llabor que faen. El últimu tema foi ‘Fame, sidra y rockangaita‘, que da nome al so últimu discu y que tamién define mui bien les intenciones del grupu de pasalo bien enriba l’escenariu y que’l públicu tamién lo disfrute.

Con esti repertoriu paecía que ya terminaba’l conciertu pero ente’l públicu ya mui animáu sentíense cantos de “otra” y “otres trés”. El grupu anunciaba que nun teníen más, qu’esi yera el repertoriu. Hebo unos segundos de dulda enantes de decidir que facer pero, si el públicu quería más, pues tocaben más. Equí arrancáronse a repetir 3 de los temes más coreaos y disfrutaos de la nueche como son ‘Nun somos nada’, ‘Les seis de la Suiza’ y ‘Kutxo’, el tema col qu’entamaron y que zarraba d’esa manera el círculu. Nestos últimos temes viose al grupu mui cómodu y disfrutando, con parte de los componentes baxando al escenariu a vivir estos últimos momentos directamente ente’l públicu. Esti colofón final dexó mui bones sensaciones y creo qu’ente’l públicu tovía unos cuantos marcharon con ganes de más.

Una vez acabada la nueche la xente foi saliendo de la sala seliquino y quedó cola bona sensación del conciertu. Enllenar una sala n’Avilés con un grupu punk que canta n’asturianu nun paecía cenciello, pero Asturtralla fíxolo y dio un conciertu nel que nun necesitaron convidaos pa que se sintiera la so presencia nel escenariu y donde se ficieron protagonistes. Espero qu’esti seya’l primeru de más conciertos n’Avilés del grupu y que puedan siguir mostrando’l so rockangaita por tol territoriu d’Asturies. El punk-rock n’asturianu nun ta muertu pero igual lo que s’echó en falta nel conciertu foi dalgo de relevu xeneracional ente’l públicu que si se ve n’otros conciertos de grupos como Dixebra o los yá mencionaos Ochobre. En cualesquier casu esti conciertu ye una bona noticia pa la música n’asturianu y pal punk n’Asturies y eso hai que celebralo.