Asturtralla edita’l so segundu CD, ‘Fame Sidre y Rockangaita’

Yá ta a la venta Fame, Sidre y Rockangaita, el segundu discu físicu d’Asturtralla. Nesti álbum el grupu punk-rock compila los once temes que foi publicando dende 2023 en formatu dixital: los del EP Grasa pal focicu, les versiones de Dixebra, Eskorbuto y La Polla, el tema dedicáu a Les 6 de la Suiza nel que collabora Raque d’Ochobre, y los del so EP recién asoleyáu, Roxos Fame Pioyos.

Esti llanzamientu coincide col conciertu que’l grupu va dar mañana a les 21.15h en La Traviesa de L’Infiestu y con entrada de baldre. L’actuación supón l’arranque de la xira Ensayos con xente nel que la banda vuelve a tocar en directo dempués de 30 años. «Nun tien muncho xacíu tar grabando cantares, xubilos a Spotify y nun llevalos al directo», desplica Xelu Estébanez, cabezaleru d’Asturtralla, sobre una de les motivaciones del so regresu a los escenarios. Tamién sorraya qu’hai trés décades dexáronlo «ehí de mala manera» y que por eso «quedara pendiente» volver a tocar. Amás fáenlo pa «intentar pasalo de puta madre y ver cómo sale, cuánta xente va, si-yos presta…«. La idea que tienen ye dar llueu más actuaciones.

Asturtralla ye ún de los primeros grupos qu’hubo de punk-rock n’asturianu. Entamaron a ensayar en 1994 n’Avilés, grabaron un par de maquetes y participaron nel compilatoriu ‘Sáca-yos la Llingua‘ (1997, L’Aguañaz) colos cantares ‘Utopía Ciencia Ficción’ y ‘Na Zona Muerta’. En 2021 regresaron asoleyando l’EP homónimu Asturtralla; al que siguió Grasa pal focicu (2023) y la publicación una serie de singles a lo llargo pasáu añu: les versiones ‘Asturies insumisa’ (‘Zapatista’, de Dixebra), ‘Nun somos nada’ de La Polla Records y ‘Ye un crimen’ d’Eskorbuto; y la composición propia ‘Les 6 de La Suiza’, cola collaboración de Reichel d’Ochobre y La Morgue y que voi votáu por los y les llectores de musicasturiana.com como’l décimu meyor cenciellu de 2025.

El vienres pasáullanzaron en toles plataformes musicales el so trabayu discográficu nuevu, Roxos Fame Pioyos, un EP de cuatro temes nos que la gaita «destaca más que n’otres ocasiones», como desplica’l cabezaleru del grupu, Xelu Estébanez, y con unes lletres qu’entemecen reivindicación, ironía, crítica social y humor. Toos estos llanzamientos nuevos compílense agora nel CD Fame, Sidre y Rockangaita.

Comprar más discos de rock n’asturianu na tienda online