El pasáu 24 d’ochobre abrió les puertes otra vuelta’l chigre Ca Beleño, tou un referente pa la música’l país. Esti llocal que s’asitió n’Uviéu ente 1987 y l’añu 2018 resurdió agora en Cualloto, compartiendo espaciu cola fábrica de cerveza artesano y taproom d’Equí. Puxar pola música en directo ye una de les característiques que marcó la identidá d’esti espaciu y qu’agora recupera: yá hai conciertos de varios estilos programaos dende la so reapertura, celebróse dalguna jam session y esti fin de selmana entamen los directos n’asturianu cola actuación d’Entós y Diañu Blues.
Entós ye un cuartetu acústicu que s’asitia ente la tradición y la reinterpretación usando vigulín, flauta, percusiones y bouzuki/guitarra. Formaos en 2024, en 2025 asoleyaron el so primer trabayu homónimu, un EP de cinco temes qu’amuesa’l virtusismu d’esta formación de folk de cámara. Esti sábadu 14 a les 20h va ser la so puesta n’escena nel Ca Beleño.
D’otra banda, Diañu Blues ye una formación xixonesa caracterizada por ser la única banda blues-rock qu’interpreta tol so repertoriu n’asturianu dafechu. Dempués d’asoleyar los cenciellos ‘Collacios’ y ‘El Baille’, llanzaron en 2023 el so primer EP Puxa’l Ximielgue. La so actuación nesti llocal va ser el domingu 15 a les 13.30h.
El Ca Beleño tamién entamó les jam session folk el vienres pasáu, cola intención de repetiles con vezu esti día de la selmana a les ocho la tarde y yá tien publicao na so páxina web los próximos conciertos que va celebrar, dientro de los que destaquen la bandina popular Los Gascones (sábadu 21 a les 18h) y el tríu de folk de cámara Draque (domingu 29 a les 13.30h). Tolos eventos tienen entrada llibre.
Suscríbite a les nuestres novedaes
