En 2022 la periodista, música y responsable de La Fabriquina, Alicia Álvarez, y la ilustradora María Ortiz publicaron Asturianes, una obra que percuerre la figura de venti muyeres y colectivos inspiradores d’Asturies. Tres más de 2000 exemplares vendíos, publícase agora la segunda parte, Asturianes 2, que recueye los llogros y biografíes de trabayadores, artistes, deportistes, científiques, cocineres, escritores y tamién trés músiques: Rogelia Gayo (la Vaqueirona y primera folclorista vaqueira), Lilián de Celis (la renovadora del cuplé) y la compositora sinfónica Teresa Prieto.
A los nomes d’Aida Lafuente, Xosefa Xovellanos, Muyeres, La Busdonga, Undershakers/Nosoträsh, les cigarreres o Corín Tellado, ente otres, que recoyía la primer entrega, hai que sumar agora otros como Maricuela, Dolores Medio, Ana María García la Llobera, l’Oviedo Moderno, Eva Canel, les trabayadores d’IKE o les primeres mineres que baxaron a trabayar llegalmente a los pozos asturianos.
«Hai tantes asturianes con llogros y vides estraordinaries que contribuyeron a la igualdá a lo llargo de la historia que ye imposible xuntales a toes nun únicu volume. Baxo esa reflexión naz Asturianes 2, segunda entrega de la obra d’Alicia Álvarez, cola qu’entamó esti proyectu d’espardimientu y puesta en valor de referentes femeninos. Muyeres y colectivos d’Asturies que, sicasí, siguen anguaño invisibilizaos por una historia escrita en masculín na que, amás, impera davezu la perspectiva global frente a la llocal, lo que tien como resultáu que, abondes veces, desconozamos la nuestra propia historia«, despliquen dende La Fabriquina, editorial responsable d’esta obra que tien 44 páxines y una cuidada edición de tapa duro a tou color.
Un proyectu qu’aportó a les aules
De magar se publicó, Asturianes tuvo abonda repercusión más allá de las llibreríes, protagonizando esposiciones y milenta actividaes alredor de la so llectura en más de venti centros educativos asturianos. La obra convirtióse nun escelente recursu educativu p’averar al alumnáu a la historia de les muyeres y los colectivos d’Asturies que, coles sos vides y llogros, contribuyeron de manera trescendental a la igualdá, afitando asina la vocación divulgativa cola que nació en 2022 esti proyectu editorial.







