«A traviés de la música alcontramos una ponte viva ente la nuestra tierra d’orixe y el nuestru presente»

Mañana celébrase en Santiago de Chile el VIII Encuentro Folclórico Asturiano, un eventu entamáu pola Colectividad Asturiana de Chile, nel que van participar la banda de gaites, grupu de baille y coral agrupada al rodiu d’esta entidá qu’axunta a la diáspora asturiana na capital del país americanu. P’afondar nesti eventu y cuestión de la diáspora falamos con Vicky Valdajos, Directora Cultural d’esta asociación dientro de la que s’enmarquen agrupaciones como la Banda de Gaitas Asturiana Ximielgu o’l Grupo de Baile Xagariteru.

Pa quien nun conoza’l vuestru llabor a esti llau del charcu. ¿Qué ye l’Asociación Colectividad Asturiana de Chile y qué funciones desendolcáis?

Ye una institución fundada en 1970 qu’axunta a los asturianos residentes en Chile, sobre manera en Santiago. El so llabor principal ye’l d’esparder y promover la cultura asturiana, non namás ente los so socios, sinón tamién pa con tola comunidá.

L’asociación desenvuelve actividaes de calter cultural, social, asistencial y de caltenimientu de les tradiciones, fomentando la participación de tola familia: güelos, pas, fíos y nietos. Ta integrada tanto por asturianos nacíos n’Asturies, como polos sos descendientes y collacios d’Asturies.

Cuntamos col reconocimientu d’asturianía, concedíu y renováu añalmente pol Gobiernu del Principáu d’Asturies, lo que refexa la nuestra estrecha y entrañable rellación cola tierra de los nuestros oríxenes. En Chile sentímonos arguyosos de ser embaxadores d’Asturies, llevando la so cultura, historia y valores acuyá de les sos llendes.

«La música asturiana foi fundamental na xunión, desendolque y evolución de la nuestra asociación. Non namás nos conecta colos nuestros raigaños y tradiciones, sinón que tamién espierta recuerdos cargaos d’emoción que nos axunten como comunidá»

La música siempre tuvo protagonismu pa la cohesión de la diáspora de munchos países. ¿Cómo veis el papel que xuega en rellación a la vuestra asociación y a Chile?

La música asturiana foi fundamental na xunión, desendolque y evolución de la nuestra asociación. Non namás nos conecta colos nuestros raigaños y tradiciones, sinón que tamién espierta recuerdos cargaos d’emoción que nos axunten como comunidá. En Chile, esti papel foi importante sobre manera, porque a traviés de la música alcontramos una ponte viva ente la nuestra tierra d’orixe y el nuestru presente, fortaleciendo la identidá y el sentíu de pertenencia dientro d’una colectividá.

Esti sábadu entamáis el VIII Encuentro Folclórico Asturiano. ¿En qué consiste esta actividá? ¿Qué balance facéis de les ediciones anteriores?

El Encuentro Folclórico Asturiano ye un eventu increíble que yá se convirtió nuna tradición pa nós. Ye una actividá que convoca a muncha xente y na que s’unen el nuestru coru, la banda de gaites y los grupos de baille, tanto adultos como infantiles, algamando un espectáculu completu y mui representativu de la nuestra colectividá.

Una de les particularidaes d’esti alcuentru ye que nun se llenda namás a música y danza: siempre incorporamos una actuación que fai de filo conductor. N’anteriores ediciones, por exemplu, tuvimos l’ambientación d’un chigre, o la presencia d’un Trasgu, y esti añu caltenemos la sorpresa. Cuntamos amás cola suerte de tener nos nuestros grupos a una actriz profesional, que con xenerosidá nos guía, ordena y algama que toos saquemos a rellumar la nuestra parte d’actores.

El balance de les anteriores ediciones siempre foi mui positivu: cada añu algamamos crecer, sorprender y, sobre manera, caltener viva y cercana la tradición asturiana en Chile.

Anunciáis que participen toles agrupaciones culturales de la colectividá. ¿Quién son?

La banda de gaites, el grupu baille y el coru de de la Colectividad Asturiana de Chile. La música y los bailles tradicionales siempre tuvieron presentes na Colectividad Asturiana de Chile dende los sos oríxenes. Yá na decada de 1960, gaiteros emblemáticos como Pepe Forcelledo y Abel Muñoz acompañaben al grupu de baille de la época. Más tarde, col sofitu de Don Rolando Moraga, foi Andrés Soberón Escandón quién garró’l relevu durante varios años.

El creciente interés de ñeños y xóvenes llevó a la creación, en 1997, de la primer escuela de gaiteros al cargu d’Andrés, d’onde nacería llueu la primer Banda de Gaitas de la Colectividad. Tres el so retiru, la dirección foi asumida durante 17 años por Don Juan Antonio Barreiro Valdajos, que tamién dexó una buelga imborrable nesta agrupación.

Dende la so formación, la banda tuvo milenta y exitoses presentaciones dientro y fuera del país. Viaxó a Asturies pa perfeccionase y recibió en Chile a mayestros reconocíos y directores de bandes provenientes de la tierrina, consolidando asina un camín de crecimientu y escelencia musical.

Per otru llau ta’l Grupo de Baile de la Colectividad Asturiana de Chile. Siempre cuntamos con un grupu entusiasta de xóvenes y adultos decidíos a caltener el folclor heredáu de los sos pas y güelos emigrantes. El grupu de baille remóntase 1969, cuando un ensame d’asturianos y fíos d’asturianos entamaron a dar forma a los primeros pasos de les dances practicaes n’Asturies durante sieglos. Güei ta formáu por persones de toles edaes: guah.es, xóvenes y adultos, tanto descendientes d’asturianos como simpatizantes. Toos intergráronse con entusiasmu, formando un grupu uníu dedicáu a cultivar y esparder l’amáu folclor asturianu.

Por último, el Coro de la Colectividad Asturiana de Chile naz el 14 de setiembre de 2002 como dalgo polo que naguábemos dende va tiempu. Los sos primeros ensayos fixéronse nel Horru del Estadio Español, con alredor venti integrantes nun coru polifónicu mestu. Los sos oxetivos iniciales fueron facer asturianía en Chile, espardiendo la música coral y complementando asina a los grupos de baille y gaites yá esistentes. D’aquel grupu fundador güei permanecen tres integantes, a los que se sumaron descendientes d’asturianos y simpatizantes que comparten l’alegría de cantar y el ciñu por Asturies. Dende l’entamu, el repertoriu buscó armonizar la música coral tradicional col folclor asturianu. Munches de les sos lletres caltienen la llingua asturiana, siendo les sos principales fontes d’inspiración los amores, el ciñu a la tierrina, el sentir del emigrante y la devoción a la Santina de Cuadonga.

«En Chile esiste otra agrupación venceyada a la Colectividad Asturiana de Viña del Mar–Valparaíso. Con ellos caltenemos una rellación mui cercana y cordial»

¿Hai en Chile más agrupaciones surdíes al marxe de la vuestra asociaciación y tenéis rellaciones ente vos? 

Sí, en Chile esiste otra agrupación venceyada a la Colectividad Asturiana de Viña del Mar–Valparaíso. Con ellos caltenemos una rellación mui cercana y cordial, tanto a nivel de directives como nel ámbitu de los grupos artísticos y, por supuesto, nes amistaes personales. Intentamos facer actividaes a comuña y siempre nos convidamos ente nós a les nuestres celebraciones, lo que fortalez los llazos y arriquez el trabayu de dambes colectividaes.

Amás d’esti alcuentru folclóricu, ¿qué más actividaes desendolcáis venceyaes a la música asturiana?

Gran parte de les nuestres actividaes tán siempre venceyaes a la música, porque ye lo que nos une y da xacíu a les nuestres celebraciones. La mayoría de les nuestres fiestes y eventos tienen presencia musical, bien seya a traviés del coru, la banda gaites o los grupos de baille. Dalgunes de les actividaes anuales nes que participamos son: La Fiesta de las Colectividades; El Encuentro Musical con Viña del Mar; Celebraciones en el Hogar Español, compartiendo con residentes españoles y descendientes; La fiesta de San Xuan; Pasacalles en el marco del Día Internacional del Folklore Español; El Encuentro Folclórico Asturiano (este año en su VIII edición); La Jornada Musical Asturiana; Encuentro Coral de Colectividades; El Campeonato de Bolos; La celebración del Día de Asturias; La conmemoración del 12 de octubre; Villancicos; La Fiesta del Desarme y la nuestra tradicional Noche de Gaitas, que’l pasáu añu cumplió la so XXVI edición. Caúna d’estes celebraciones ye una oportunidá pa caltener viva la tradición, compartila con xeneraciones nueves y dar a conocer la riqueza de la música y el folclor asturianu en Chile.

«L’asturianu siempre ta presente na nuestra asociación y la música tamién xuega un papel cimeru: al cantar munchos cantares n’asturianu, les xeneraciones nueves van incorporando pallabres y espresiones cuasi ensin decatase»

Dada la rellación qu’hai ente música y llingua asturiana. ¿Promovéis tamién dalgún tipu d’actividá pa puxar pol asturianu? ¿Tenéis persones socies con conocimientu d’esti idioma?

Sí, l’asturianu siempre ta presente na nuestra asociación por delles razones. En primer llugar, tovía cuntamos con varios integrantes d’orixe que lo falen y que intentaron tresmitilu. Tamién tuvimos, anque va yá un tiempu, la visita de dalgún profesor de llingua. Amás, la yá mentada Escuela de Verano de Asturianía foi fundamental, pues ente los cursos qu’ufren s’inclúi la llingua asturiana. A esto súmase la posibilidá d’acceder a cursos online promovíos pol Principáu, que resultaron mui afayadizos pa quien quiera deprender o recordar conocimientos.

La música tamién xuega un papel cimeru: al cantar munchos cantares n’asturianu, les xeneraciones nueves van incorporando pallabres y espresiones cuasi ensin decatase. Anguaño tenemos un proyectu, tovía nes sos primeres etapes, pa poder concretar un cursu más formal d’asturianu dientro de la nuestra asociación.

Mirando pa esti llau del Atlánticu. ¿Conózse y consúmese la música asturiana contemporánea ente socios, socies y públicu de les vuestres actividaes? 

Sí, dafechu. Pa nós, que tamos tan lloñe d’Asturies, tolo qu’aporta dende ellí recibímoslo y disfrutámoslo enforma. La música asturiana contemporánea ye mui valorada nos nuestros círculos y en caúna de les nuestres actividaes conviértese nun elementu mui apreciáu, porque nos conecta de manera directa y viva cola nuestra tierrina.

«Visitónos la Banda Gaites Xácara, vinieron a poner clase los gaiteros Guti, El Pravianu y Flavio R. Benito, amás del profesor y folclorista Fernando de la Puente y a les pandereteres Les Filanderes»

¿Pudistis llevar a tocar a dalgún grupu asturianu ellí? Si ye asina, ¿Podéis decinos dalgún nome y resumir cómo foi la esperiencia?

Sí, tuvimos la oportunidá de recibir a dalgunos grupos y músicos asturianos, anque reconocemos que nesti sen prestaríanos poder facer más. Fai yá dalgunos años visitónos la Banda Gaites Xácara y la esperiencia foi inolvidable: l’intercambiu y los llazos que se crearon dexaron una buelga mui fonda na nuestra colectividá. Tamién cuntamos cola presencia de gaiteros que vinieron a poner clases, como Guti, El Pravianu y Flavio R. Benito, amás del profesor y folclorista Fernando de la Puente. Les sos visites foron mui arriquecedores y aprovechamos al máximo los sos conocimientos. Tamién recibimos al grupu de pandereteres Les Filanderes, que nos permitió averanos de manera especial a esa parte tan importante de la tradición musical asturiana.

En cuantes a artistes más conocíos, a Chile llegaron Víctor Manuel y Melendi. Fuimos a los sos conciertos como públicu, siempre arguyosos de llevar la bandera asturiana pa marcar presencia. Per otru llau, tamién fomentamos l’intercambiu con agrupaciones cercanes, reuniéndonos con bandes de gaites de Mendoza y, n’ocasiones, de Buenos Aires, lo que nos permite caltener vivu l’espíritu de la música asturiana nesta parte del mundu.

Si pudierais convidar a un artista asturianu actual a Chile, ¿A quién escueyeríeis y por qué? 

Pensaría en referentes de la nuestra música tradicional como Xuacu Amieva, mayestru de la gaita y símbolu de la esencia asturiana; Anabel Santiago, cola so gran voz de tonada; Hevia, que cola so gaita electrónica supo llevar la música de los nuestros raigaños a escenarios internacionales; o’l gaiteru Guti, con quien yá tuvimos la suerte de compartir y que representa de manera escepcional la nuestra tradición musical. Tamién sería mui especial cuntar con Melendi, qu’algamó muncha sonadía nel mundu de la música y siempre s’amosó arguyosu de los sos oríxenes asturianos. Cualaquier d’ellos sería un lluxu braeru pa compartir cola nuestra colectividá y averanos tovía más a la tierrina.

«Siguir afondando nestes instancies formatives y d’intercambiu cultural va ser clave pa que la música asturiana continúe xorreciendo y proyectándose nel esterior»

L’eventu de mañana cunta col sofitu del gobiernu asturianu. ¿Qué papel xueguen les instituciones asturianes en sofitar la música asturiana nel esterior? ¿Qué más se podría facer p’afondar nesta cuestión?

Ensin el sofitu del Principáu d’Asturies sería mui difícil llevar alantre les nuestres actividaes. Acullá de les subvenciones económiques que podamos recibir, lo más valioso foi l’accesu a les Escuelas de Verano de Asturianía, que resultaron esenciales pa nós. Gracies a elles, representantes de los nuestros grupos -tanto en gaita y percusión mayor, como en baille y percusión menor-, pudieron formase, algamar conocimientos y tresmitilos llueu en Chile, asegurando asina la continuidá y el crecimientu de les nuestres agrupaciones.

Amás, l’unvíu de profesores especializaos, tanto de baille como de gaita, foi indispensable dafechu pa la nuestra colectividá, por mor de lo lloñe que tamos d’Asturies. Estos aportes son valoraos enforma, porque non fortalecen namás les nuestres capacidaes artístiques; tamién permiten que caltengamos un vínculu directu y vivu cola tradición musical asturiana. Nel futuru, siguir afondando nestes instancies formatives y d’intercambiu cultural va ser clave pa que la música asturiana continúe xorreciendo y proyectándose nel esterior.

«Na Noche de Gaitas, qu’esti añu va celebrar la so edición ventiséis, algamamos reunir a bandes y grupos representativos d’Escocia, Irlanda y Galicia xunto a nós, xenerando un espectáculu únicu que reflexa la unión celta y que cada añu avera a más públicu»

Y yá pa rematar; cultures celtes con una diáspora fuerte como la escoesa o la irlandesa son conocíes en tol mundu. Cuando en Chile decís que sois d’orixe asturianu, ¿cuál ye la respuesta que recibís?

Munches de les persones tovía asocien la gaita con Escocia, sobre manera pola influencia de películes y la imaxe de la falda escocesa. Sicasí, pasín a pasu, vamos trabayando en marcar la diferencia, amosando la nuestra propia identidá y desplicando les particularidaes que distinguen a la tradición asturiana.

El meyor exemplu d’esto ye la nuestra Noche de Gaitas, qu’esti añu va celebrar la so edición númberu 26. Nesti eventu algamamos reunir a bandes y grupos representativos d’Escocia, Irlanda y Galicia xunto a nós, xenerando un espectáculu únicu que reflexa la unión celta y que cada añu avera a más públicu y xenera más interés por participar