La música asturiana y la divulgación musical tienen un espaciu na nueva edición de Xixón Fala en 3, el certame que reta a los participantes a esplicar una idea, un proyectu o una investigación n’asturianu nun tiempu máximu de trés minutos. La convocatoria de 2026 permite presentar esposiciones orales sobre temátiques musicales, una oportunidá pa compartir conocimientos sobre la tradición sonora asturiana, la historia de los grupos y intérpretes, los instrumentos, los cantares o cualesquier otru aspectu venceyáu a la música.
El concursu va celebrase’l sábadu 28 de payares, a les 11 hores, nel Salón d’Actos del Centru de Cultura Antiguu Institutu (CCAI) de Xixón. El plazu pa presentar candidatures ta abiertu del 24 d’ochobre al 12 de payares, dambes feches incluyíes. Les persones interesaes han consultar les bases de la convocatoria y formalizar la so inscripción al traviés de los canales habilitaos pol Conceyu de Xixón.
Xixón Fala en 3 busca fomentar les habilidaes de comunicación y divulgación n’asturianu, proponiendo a los participantes el retu de tresmitir conteníos con rigor y de forma clara, comprensible y atractiva pa un públicu xeneral. La propuesta tien que concentrase nun únicu tema y adaptase al formatu breve, lo que obliga a escoyer les idees fundamentales y presentales con precisión, ensin necesidá de que l’audiencia tenga conocimientos previos sobre la materia.
La iniciativa nun se limita, sicasí, a la música nin a los asuntos específicamente asturianos: el certame ta concebíu como un espaciu pa esplicar temes d’interés diversu utilizando l’asturianu como llingua de comunicación. D’esta manera, la convocatoria brinda tamién una posibilidá pa tratar otres disciplines y investigaciones, siempre d’alcuerdu coles condiciones recoyíes nes bases. Na edición de 2026, el concursu cuenta con dos categoríes d’edá: una pa participantes d’ente 18 y 30 años, dambos incluyíos, y otra pa persones mayores de 30. En caúna d’elles van concedese tres premios, dotaos con 850 euros pal primer puestu, 425 euros pal segundu y 225 euros pal terceru, según la información de la convocatoria.
Suscríbite a les nuestres novedaes
