Nos últimos años tán surdiendo en Galicia una montonera de propuestes artístiques moces y novedoses que van acullá del «fenómenu Tanxugueiras«. Pop, música tradicional renovada, trap, electrónica, pachanga, indie, garage… son dalgunos de los estilos que faen nomes como Verto, Fillas de Cassandra, Mondra, Catuxa Salom, Ortiga, crnds, Jinetes del Trópico o The Rapants; ente munchos otros. Ye una escena musical gallega nueva; con puxu; que tien milenta d’oyentes en plataformes dixitales; que xira de siguío pel so país y de la qu’esti fin de selmana van a aportar a Xixón, Teberga y Uviéu dos de les sos formaciones: Alana y Boyanka Kostova.
Formáu en 2023, Alana ye un tríu qu’entemez la música tradicional gallega con soníos d’anguaño como la electrónica o’l pop. El pasáu añu asoleyaron el so primer álbum, O xeito á cántigha, un discu fechu «cola collaboración de munches muyeres y homes que desinteresadamente contribúin a caltener la riqueza de la música y de la tradición». D’esta manera, axunten pieces recoyíes de la tradición oral p’amestales a un proyectu «nuevu, diversu, con una puesta n’escena potente y una importante vinculación cola tradición y el baille«, como presenta Urdime, la so axencia de contratación. Gracies al so llabor algamaron l’añu pasáu’l Premio Xuventude Crea que concede la Xunta de Galicia na estaya de música.
Alana aporten a Asturies con fuercia y van facer triplete: el xueves 27 toquen nel Atenéu de La Calzada (Xixón) a les 19h y con entrada llibre; el vienres 28 na Taberna Narciso de Teberga a les 22h y de baldre; y el sábadu 1 en Lata de Zinc (Uviéu). Esti eventu últimu tien una entrada de 10 € anticipada y de 13 € na puerta y nél Les Pites van acompañar al tríu gallegu amenizando’l pre y post conciertu nuna «folixa tradicuir» de les qu’entama davezu esti colectivu.
Per otru llau, el sábadu 1 a les 21.30h actúen en La Salvaje, con un preciu de 13 €, Boyanka Kostova. Esti dúu formáu por Cibrán García y el polifacéticu Ortiga (Chico do Funk) son los pioneros del trap gallegu. Na so propuesta pue sentise «retranca gallega, folclore, ritmos tradicionales, soníos urbanos, contemporáneos y electrónicos, loops d’efectos, samples, caxes de ritmos…», como dicen dende’l so sellu, Ernie Records. El resultáu ye lo que definen como «puru flow rural. Trap d’aldea, pero universal«. El dúu estrenóse en 2018 col EP Vella Canción Galega –toa una declaración d’intenciones y retranca- y tien 26 llanzamientos publicaos en Spotify ente singles, EPs y álbumes completos. El so discu de llarga duración más recién ye Foliada no inferno, asoleyáu’l pasáu añu.
Nun ye mui frecuente ver formaciones d’esta fornada nueva de música gallega que xire per Asturies; asina qu’esta visita nun mesmu fin de selmana ye una bona oportunidá p’averase a conocer la creación musical moza que ta faciendo la ‘Xeneración Xabarín’ nel país vecín; un territoriu que lleva más de 40 años desendolcando una política llingüística y musical que, xunto al puxu del movimientu popular, posibilita qu’agora surdan tantes formaciones musicales nueves.
Suscríbite a les nuestres novedaes
