Xicu Ariza: «Tanxugueiras: el reflexu d’una política cultural»

Tres muyeres. D’ente 24 y 31 años. De pueblu. Que conocen, respeten, caltienen y esparden los raigaños musicales de la so tierra dende la perspectiva más tradicional hasta la más actual. Que canten na so llingua propia minorizada y nes de la so redolada, incluso na nuestra, qu’inda nun tien nin el mesmu reconocimientu oficial que les demás. Millones de persones de tol mundu tán viendo esto per televisión y per YouTube dende va unes selmanes gracies a Tanxugueiras. Nun hai fronteres, nin pallabres pa resumir tolo qu’esto significa.

Pero Tanxugueiras nun son una casualidá. Son el resultáu d’unes polítiques culturales que lleven 40 años trabayando en defensa de la cultura autóctona. Tanxugueiras son les fíes del Xabarín Club. Una xeneración que medró consumiendo una televisión que falaba nel so idioma y que reflexaba la realidá cultural, social y política del so territoriu; que pudo sentir música gallega na radio y na tele; que vivió la cultura de raigañu encesa, disfrutando y participando d’ella nel día a día, en cada fiesta de pueblu y ciudá, na foliada más improvisada. “Vivamos como galegos” díxo-yos un día un anunciu de la cadena de supermercaos más grande del so país y nun fueron pallabres namás, porque esta empresa invierte parte de los sos beneficios privaos en patrocinar eventos de cultura autóctona. Asina crecieron Aida, Olaia y Sabela, un día montaron un grupu y gracies al so talentu y a un públicu que quería consumir la so música, pudieron dedicase profesionalmente a Tanxugueiras. Too ello muncho enantes d’esti boom d’Eurovisión, que las pue llevar a la final de Turín, anque en realidá elles yá tán d’amosar al mundu lo que ye Galicia y la so cultura, como lo demuestren los conciertos que dieron n’India, Cuba, Reinu Xuníu o Suiza. 

«Los responsables políticos gallegos decidieron que facer polítiques culturales y destinar un presupuestu dignu pa ello, nun yera un gastu; yera una inversión. La riqueza que xenera Tanxugueiras ye parte del resultáu»

Tanxugueiras ye ilusión, ye arguyu, ye esperanza, ye identidá, ye terra. Y ensin dulda la trescendencia que tán teniendo xenera un retornu económicu, turísticu, cultural y social pa Galicia. Xenera una riqueza y una autoestima colectiva pal pueblu gallegu que nun se cuantifica n’euros, porque val muncho más. Va 40 años, los responsables políticos gallegos decidieron que facer polítiques culturales y destinar un presupuestu dignu pa ello, nun yera un gastu; yera una inversión. Galicia Calidade, y Tanxugueiras ye’l resultáu d’anguaño más mediáticu y trescendente, pero hai munchos más.

Güei dende Asturies vamos sofitar a Tanxugueiras nel Benidorm Fest y mirámosles con almiración y tamién con envidia sana; cola mirada de quien sufrimos vivir nun país en “víes de desarrollu cultural”. Porque mentes Aida, Olaia y Sabela veíen el Xabarín Club y vivíen el procesu enantes mentáu, equí too llega tarde o nin llega. Tardamos 30 años en tener una televisión propia y, 16 años depués de la so fundación, tovía nun fuimos quien a ver dibuxos animaos n’asturianu con regularidá, nin una teleserie cola que venos identificaos na pantalla. Malpenes sentimos la música del país con un tratamientu dignu y integral; nin nel mediu de comunicación públicu nin tampoco nes cais, con programaciones culturales nes que la presencia d’ella ye testimonial. Qu’una cadena de supermercaos que tribute n’Asturies invierta parte de los sos beneficios en patrocinar la cultura propia, ye cuasi falar d’una utopía. Podíemos allarganos nesti cúmulu de despropósitos acumulaos a lo llargo de 40 años d’autonomía. Pero parte del resumen d’esta rueda ye qu’hai un desconocimientu xeneralizáu de la cultura y la música asturiana, lo que causa que la xente nun tenga interés en consumir productos culturales propios, lo que xenera que quien quiera trabayar na industria cultural tenga series dificultaes pa profesionalizase, lo que fai qu’un sector que podría contribuyir al desarrollu económicu, cultural, social y turísticu d’Asturies, se vea como una caxigalina.

«Un sector musical que podría contribuyir al desarrollu económicu, cultural, social y turísticu d’Asturies, vese como una caxigalina»

Nunca ye tarde y nel últimu añu paez qu’empieza haber movimientu per parte de los responsables políticos en materia cultural. Vese voluntá, y ye un puntu de partida imprescindible; hai munchísimo que percorrer y l’exemplu del país vecín ye referencial porque, si ellos lo fixeron, ¿por qué nós nun podemos?. Creyendo nello, con polítiques estables y ambicioses y con una inversión presupuestaria digna pa desendolcalo, quiciabes un día, haiga tres muyeres moces, de pueblu, qu’amuesen en televisión delantre de millones de persones la herencia cultural que nos dexaron les nuestres güeles. Y qu’elles seyan namás la punta del iceberg d’una industria cultural fuerte y d’un pueblu arguyosu de compartir la so identidá col mundu. Ensin fronteres.

Xicu Ariza. Responsable de musicasturiana.com

Dexa un comentariu

X