A finales de 2019 asoleyaba ‘Afluentes‘, el sestu discu -segundu n’asturianu dafechu- d’Alfredo González. Dos años depués y una pandemia pel mediu, esti renomáu cantautor acaba la xira del so últimu álbum esti vienres 10, a les 21.30h na sala La Salvaje d’Uviéu, nun conciertu especial que va servir tamién pa celebrar los sos venti años enriba los escenarios. Pal 2022 yá hai planes: la publicación de dos EP -ún n’asturianu y otru en castellanu-, pa los que yá hai abiertu un crowfunding de sofitu.
«L’EP nuevu va llamase ‘Asuntu de Fe‘ y va tar formáu por cuatro canciones nueves con lletra y músiques míes, menos un tema que tien lletra de Pablo Texón, col que llevaba ensin collaborar dende ‘Dobleces’ (2011, Algamar Producciones), y que ye un autor mui especial pa mí», comenta pa MUSICASTURIANA.COM Alfredo González sobre esti nuevu trabayu «producíu por Sergio Rodríguez nos Tutu Estudios y interpretáu dafechu por Sergio y por mí, sacantes un tema nel que toca’l mio baterista habitual». Tamién anuncia les collaboraciones de Cristina Gestido colos arreglos y grabación de les cuerdes pa un cantar y d’otru artista mui destacáu «del que tovía nun se pue cuntar nada».
‘Asuntu de Fe’, que lu va editar el sellu Algamar Producciones previsiblemente en febreru de 2022, supón la vuelta d’Alfredo González a publicar un trabayu n’asturianu dafechu, daqué que nun facía dende va una década. Una espera que’l cantautor desplica asina: «Ente ‘Afluentes’, que tenía un tema mío n’asturianu, y esti nuevu EP, compusi’l discu enteru de Silvia Quesada y fici collaboraciones pa Muyeres, Alienda y otros artistes que tovía nun publicaron esi material, por eso tuvi ocupáu en componer pa los demás, que munches vegaes casi me presta más que componer n’asturianu pa mí».
Amás d’esti nuevu EP, tamién hai previsión de qu’en marzu salga otru EP en castellanu entituláu ‘La Insistencia‘ y producíu por Pachi García «Alís». «Son, cenciellamente, ocho nuevos cantares que nagüen por ser guapos. Nun tienen más ambición que ser un espeyu onde vos veáis… Anque tea frayáu, anque tea enllenu polvu», comenta’l cantautor na web del crowfunding qu’hai abiertu pa sofitar la publicación d’estos dos trabayos.
Conciertu en La Salvaje
«El d’esti vienres va ser un conciertu especial porque cumplo venti años enriba los escenarios, asina que vamos tocar canciones de tolos discos, cola banda eléctrica al completu y vamos poner tolo que podamos enriba l’escenariu». comenta Alfredo González sobre’l fin de xira que tien esti día 10 en La Salvaje y nel que tamién va haber dellos artistes convidaos. Les entraes pueden mercase anticipaes por 10 euros n’Entradium y na mesma sala por 12 euros.
Alfredo González ye ún de los cantautores actuales más reconocíos de la escena asturiana. La so carrera entamó en 2001 y pasín a pasu foi faciendo camín con 6 discos nos que suena una canción d’autor influyía pol rock o l’indie. Ente la so discografía rescampla ‘La Nada y Tu’, del añu 2009, que ta n’asturianu dafechu y que ye’l más gallardonáu, con premios como’l Meyor Cantar en Llingua Asturiana o’l Premiu de la Crítica RTPA al Meyor Discu d’Autor. Tienen collaboráu con esti artista escritores de sonadía como Pablo Texón o músicos como’l reputáu Quique González, que llegó a cantar n’asturianu nun tema.
Suscríbite a les nuestres novedaes
