El grupu formáu por un asturianu y tres escoceses, Glastur, publica’l so primer EP

El cuartetu Glastur (nome amiestu de Glasgow y Astur), onde militen tres músicos escoceses y ún asturianu ta acabante de presentar na plataforma bandcamp el so primer trabayu; trátase d’un EP coles pieces titulaes «From Glasgow to Asturias», «The Loop Reel» y «The Oakwood». El soníu de la banda transita ente lo acústico con dellos toques eléctricos y la batería como base de la so percusión.

Los primeros contactos ente ellos tuviéronlos na etapa del confinamientu por cuenta del andanciu del COVID-19; nesti sen, foron nun primer momentu Martin Laird y Mike Pont los qu’escomenzaron a facer música xuntos on-line, a ellos xuntóse-yos más tarde David Fernández, un asturianu residente en Glasgow, por últimu aunióse-yos Amy Lewis pa completar el cuartetu. Asina foi como, pasín ente pasu, foron iguando un repertoriu con pieces tradicionales esoceses y asturianes, amás de composiciones propies.

Nel mes de setiembre pudieron, por fin, aconceyar físicamente y facer la grabación d’estes tres pieces de folk-rock astur-escocés que puede sentise equí (https://glastur.bandcamp.com/album/glastur-ep).

Comprar discos folk na tienda online