Esti sábadu salió en toles plataformes musicales ‘El rescamplíu‘, el tema nuevu del grupu power-folk Alienda. Trátase d’una pieza instrumental qu’en pallabres de Fran Rodríguez Buznego, bouzukista de la formación, «tien un soníu un poco diferente a lo que veníemos faciendo y ta influenciáu por dalgunos grupos que tán despuntando nel panorama actual del folk instrumental». El tema amás pon Banda Sonora Oficial a esta edición del Festival Internacional de la Gaita de Villaviciosa (FIG).
«Queríemos que fuera un tema potente y enérxicu, que pudiere funcionar bien nel directu y qu’animare a la xente a movese y baillar«, desplica’l componente d’Alienda sobre un cantar que grabaron por varies razones: «Yá pasaron dos años dende que sacamos el discu y sentíemos que yera’l momentu d’asoleyar material nuevu, yá que nun queremos estancanos y tamién influyó’l fechu de que vamos tornar a tocar en Lorient, y mos prestaba editar un single pa poder presentar ellí».
‘El rescamplíu’ ye tamién la BSO de la XVIII edición FIG, una collaboración que surdió asina: «El nuestru gaiteru, Illán Escalada, ye ún de los directores del festival. Taben xusto cola organización de la presentación y ensin tema pa esti añu, y en cuantes lo sintió grabáu nun lo pensó. Tenía fuercia, tenía gaita, yera pegadizu y yera de casa. Propúnxolo y encaxó perfeutamente, polo que foi una bona simbiosis». Amás, el bouzukista matiza que’l planteamientu del tema yera «llevalu a Lorient representando a Asturies, asina que por qué nun representar tamién al FIG«.
«La idega ye ponenos a la xera de componer y facer arreglos y siguir sacando material. Hai más idegues que nun pudimos concretar por falta de tiempu, yá que queríemos que’l single tuviera asoleyáu enantes de dir a Lorient, entós en función del material que tengamos, veremos si podemos sacar varios singles o incluso’l segundu discu«, avanza Fran Rodríguez Buznego al rodiu les intenciones del so grupu na cuestión discográfica.
‘El rescamplíu’ ye tamién el reflexu de que por fin Alienda tien una formación estable -la emigración forciada de dellos de los sos componentes torgó’l desendolcu d’esti proyectu per unos cuantos años-, y qu’asina ye como nagüen por «tener muncha más continuidá y poder siguir cola bona llinia compositiva».
«Cuando acabe’l branu, la idega ye siguir componiendo y preparando material nuevu pa siguir faciendo camín y avanzando como grupu», añade’l componte d’Alienda. Mentanto, tán «enfotaos en preparar un bon espectáculu» pa los conciertos que tienen axendaos esti branu: el Festival Arcu Atlánticu de Xixón (31 de xunetu a les 20.30h nel Antiguu Institutu) y trés conciertos nel Festival Intercélticu de Lorient ente’l 4 y el 6 d’agostu.
Suscríbite a les nuestres novedaes
