Alienda y Guieldu tán nominaos nel concursu Runas 2023 y necesiten votos online pa poder tocar n’Ortigueira

El Festival Internacional do Mundo Celta de Ortigueira ye l’eventu más importante del xéneru na Península Ibérica y dende va 23 años entama’l Concurso Runas pa grupos noveles. Nesta edición hai dos grupos asturianos preseleccionaos, Alienda y Guieldu, y pa poder pasar a la fase final del concursu -na que van participar tres bandes- necesiten ganar la votación online.

Agora mesmo Alienda tán en sesta posición con un 11% de los votos y Guieldu en segunda, con un 14%. La votación pue repetise cada 24 hores dende dispositivos estremaos -ordenador, teléfonu, tablet-, y los tres finalistes van tocar dientro del festival el llunes 10 de xunetu de 2023. Quien gane nesa final, tien garantizáu un conciertu nel escenariu principal pa la edición de 2024.

Amás de la posible presencia d’Alienda y Guieldu, va haber presencia asturiana coles actuaciones d’Algaire‘l martes 11 de xunetu y de Felpeyu‘l miércoles 13. Esti festival que se celebra dende hai 45 años na llocalidá coruñesa d’Ortigueira ye un perbón escaparete pa la música asturiana yá que peles sos últimes ediciones pasaron más de 100.000 persones.

Mercar discos de los grupos participantes