Anabel Santiago, una de les voces y de les cares más reconocíes de la escena musical asturiana, va ser la protagonista del episodiu de Xuntanza d’esti sábadu 4 d’ochobre. A les 22.30h esti programa de TPA dedicáu a «celebrar la música al traviés de quienes la viven, la reinventen y la tresmiten» va recoyer les actuaciones de la cantadora Mariluz Cristóbal Caunedo, el grupu Compañeras, l’Asociación de Folclore La Flor de Grau, el compositor Xulio Arbesú y los músicos Luis Pola, Daniel Álvarez y Guillermo Barrera.
Anabel Santiago ye la cantante actual de tonada más reputada y popular, amás d’una renovadora d’esti xéneru musical. Nacida n’Arxentina en 1981, entamó a cantar con namás 13 años. En tou esti tiempu ganó una montonera de concursos de canción asturiana, algamó premios musicales d’ámbitu asturianu y estatal; subió a milenta escenarios y participó n’estremaos proyectos como l’espectáculu Torner. La so discografía ye bayurosa y variada, con siete discos en solitario nos que la so voz suena tanto nes formes más clásiques de l’asturianada como amestándose a estilos tan estremaos como la electrónica, el tango, el country o’l pop.
Pal capítulu d’esti sábadu en Xuntanza, l’artista -que yá fuera copresentadora del programa de la canal pública asturiana Axuntábense– va arrodiase de persones bien cercanes como la dama de l’asturianada Mariluz Cristóbal Caunedo, el grupu Compañeras que naz de la Escuela de Música Tradicional Manolo Quirós onde Santiago pon clases de tonada, la recién creada asociación La Flor de Grau y músicos que l’acompañaron enriba los escenarios: Xulio Arbesú, Luis Pola, Daniel Álvarez y Guillermo Barrera.
Suscríbite a les nuestres novedaes
