TPA sigue emitiendo tolos domingos a les 21.45 Xuntanza, el programa dedicáu a «celebrar la música al traviés de quienes la viven, la reinventen y la tresmiten». Nel capítulu d’esti 3 de mayu l’escenariu del programa «vístese de gala pa celebrar la fuercia y la calidá de la música asturiana cola mirada puesta nuna cita imprescindible: el Festival Intercélticu de Lorient«. D’esta manera ye como’l responsable de la delegación asturiana, Iñaki Santianes, el gaiteru Rubén Alba y el tríu Rellume van participar nel episodiu de güei.
«El programa profundiza na xestión y el virtuosismu de la gaita cola presencia d’Iñaki Santianes, presidente de la delegación asturiana en Lorient, y Rubén Alba, Premiu AMAS y renovador del instrumentu, quienes van desvelar los secretos de la espedición asturiana hacia tierres bretones«, despliquen dende Xuntanza.
Tamién van actuar Rellume, una de les formaciones moces que representen al nuestru país na edición d’esti añu del eventu más prestixosu del mundu celta. El tríu formáu por Alba Suárez, Ana Feito y Alba Estrada «desembarca nel plató p’amosar por qué son una de las formaciones femenines de pandereteres y voces con más proyección del momentu», despliquen dende’l programa.
Amás d’esto, les anfitriones del programa, Anabel Santiago y Mina Longo, van «guiar per un viaxe que crucia llendes, onde la tradición asturiana y la cántabra danse la mano nuna hermandá sonora inoldivable». D’esta manera, dende’l programa destaquen que van participar tamién Güeyos, un tríu cántabru que trai «una propuesta que ye esencia de monte y manr» y, xunto a ellos, «el talentu individual d’Esteban Verdeja, ganador recién del II Premiu d’Asturianada «La Busdonga», que poner nel escenariu la interpretación d’esti xéneru.
Por últimu, nel capítulu de Xuntanza d’esti domingu va actuar l’alumnáu del aula d’acordión de la Escuela de Música de Siero, lliderada por Iván Coya: «una verdadera institución qu’amuesa la vitalidá d’un instrumentu que sigue faciendo vibrar a toles xeneraciones», conclúin dende Xuntanza.
Suscríbite a les nuestres novedaes
