TPA sigue emitiendo tolos domingos a les 21.45 Xuntanza, el programa dedicáu a «celebrar la música al traviés de quienes la viven, la reinventen y la tresmiten». Nel capítulu d’esti 8 de marzu, Día Internacional de la muyer, el programa conviértese nun altavoz de la fuercia femenina y del relevu xeneracional conducíu por Anabel Santiago y Mina Longo.
El sofá d’esti domingu llénase d’hestoria cola visita de Luis Ángel Fernández Santos y Loreto Suárez, representantes de Prau Llerón. El veteranu grupu mierense celebra los sos 45 años de trayectoria compartiendo los detalles del so ambiciosu estrenu, Diarios d’Ampudia, y enfrentándose a un divertíu “Test Mierense” pa demostrar si son más de prau o d’asfaltu.
D’otra banda, la tonada tien tamién protagonismu na entrega d’esti programa. Néstor Díaz, dende Llanes, visita l’espaciu siendo ganador recién del Premiu La Busdonga d’asturianada na so categoría moza. Un momentu que va ser interesante de ver, yá que la presentadora Anabel Santiago ye unu de los referentes principales pal cantante mozu d’asturianada.
El ritmu más festivu y desenfadáu van ponelu Los Vicentos, formación de Cabrales que revolucionó les redes sociales y qu’amuesa la so versatilidá pa saltar d’una muñeira a los acordes del rock y el ska. Nel viniente mes de mayu, va poder vese-yos actuar en casa, nel Válgame Fest.
A lo último, el programa pieslla col compromisu cultural de Marta Fernández y Pablo Fernández, de l’Asociación Caricós, exemplu de que na etnografía asturiana “tien d’haber y hai relevu”. L’asociación Caricós fai un trabayu pervalible na recuperación y difusión de la música tradicional y convoquen slow sessions dos veces al mes. Nel mes de febreru, y en collaboración col Semando Fest, fixeron una session nel Chigre L’Esperteyu na que participaron más de 15 artistes moces.
Suscríbite a les nuestres novedaes
