El grupu punk-rock Asturtralla sigue dando novedaes dempués de la so vuelta a l’actividá hai cinco años. El 13 de marzu van llanzar el so tercer EP, Roxos Fame Pioyos, un trabayu formáu por cuatro cantares nuevos y de los que pue sentise yá en toles plataformes musicales el primer adelantu: ‘Zarréu‘.
«Esti tema ye un poco distinto a lo que solemos facer. Punxímonos una migayina más serios y tamos bastante arguyosos del resultáu», desplica Xelu Estébanez, cabezaleru de la formación, al rodiu d’esti cantar que fala «del accidente de Zarréu, que va facer un añu dende que pasó y tovía naide pagó por ello«. Asina ye como esti cantar -que tien un ritmu más sele del que suena notres composiciones del grupu- falen tamién «d’otres traxedies qu’hubo na minería yá nel sieglu pasáu». «Paez mentira que tovía sigan pasando estes coses», sentencia’l cantante.
Col llanzamientu del so próximu EP Asturtralla calecen l’ambiente pa la so vuelta a los escenarios. El sábadu 28 de marzu, a les 21.15h, con entrada de baldre, La Traviesa de L’Infiestu va acoyer l’arranque de la xira Ensayos con xente nel que’l grupu punk-rock va volver a tocar en directo dempués de 30 años.
Suscríbite a les nuestres novedaes
