Asturtralla publica ‘Grasa pal focicu’, el so segundu EP
Yá ta en toles plataformes dixitales Grasa pal focicu, el trabayu nuevu de la banda punk-rock Asturtralla. L’EP ta formáu por tres temes: dos versiones nueves de “Utopía” y “Na Zona Muerta” -temes que yá apaecíen nel compilatoriu Sáca-yos la llingua (L’Aguañaz, 1997)– y “Culiebra Venenu”. Esta última tamién ye «una canción vieya d’Asturtralla reconvertida nuna versión nueva con otra lletra y otru títulu», desplica Xelu Estébanez, cabezaleru de la formación.
«Lletres de denuncia y música punk-rock, anque esta vegada con un toque más de rocanrol». Asina define’l cantante d’Astutralla a estos tres temes nuevos. Él, xunto al guitarrista Panfle, el gaiteru Xurde Areces y Sergio Tutu y Isra Sánchez -que grabaron baxu y bateríes respectivamente-, dan forma a los cantares que formen Grasa pal focicu. Amás collaboren dos ex componentes del grupu: Berto Skontra que foi’l primer gaiteru de la formación y Pablo Viña que foi’l batería.
D’esta manera Astutralla da un pasu más llueu de llanzar a finales de 2021 Asturtralla 2.0, la primer grabación d’esti proyectu musical dempués de más de dos décades ensin asoleyar nada. Lo siguiente yá ta na mente de Xelu Estébanez: «En 2024 cúmplense 30 años desque grabamos la maqueta y tien que facese un conciertu sí o sí».
