Yá ta en toles plataformes musicales ‘Les 6 de La Suiza‘, el single nuevu d’Asturtralla. La formación punk-rock llanza agora un tema nuevu d’autoría propia -tres d’asoleyar dende va unos meses trés versiones d’otros grupos- y fáilo en compañía de Raichel, vocalista d’Ochobre y La Mørgue. La razón que ta detrás ye solidarizase coles seis sindicalistes encarcelaes a cuenta del conflictu llaboral na pastelería La Suiza y siguir amosando’l sofitu con elles «hasta algamar l’indultu», como desplica’l cabezaleru del grupu Xelu Estébanez.
«Pareznos mui importante que la xente de la música implíquese en causes sociales pa facer que casos como esti de Les 6 de La Suiza los conoza tola población y obligue a la clase política a que tome partíu nestes coses y que se vean obligaos a moyase», comenta’l vocalista al rodiu la intencionalidá de publicar esti tema nuevu. Estébanez celebra qu’estes sindicalistes algamaren el tercer grau «gracies a la movilización de la xente y del grupu de sofitu» pero sorraya «qu’esto supón siguir baxo’l réxime penitenciariu y tener que dir a dormir al CIS de domingu a xueves», polo que’l músicu reivindica l’indultu.
P’axuntar fuercies, Asturtralla arrodióse nesta ocasión de Raichel d’Ochobre y La Mørgue: «Pensamos que colo bien que canta podía quedar mui guai… y ehí ta’l resultáu de que lo fizo perbién», opina’l cantante. Asina ye como con esti tema nuevu de punk-rock-folk, la causa de Les 6 de La Suiza sigue sintiendo la solidaridá dende la barricada musical tres de que’l pasáu febreru publicárase’l cantar colectivu compuestu por Skontra y Paco Álvarez ‘Nun ye delitu’.
Suscríbite a les nuestres novedaes
