Avilés acueye esti fin de selmana los conciertos de Muyeres y Los Berrones

2022 entama con música asturiana en vivo y el Centru Niemeyer d’Avilés acueye esti fin de selmana dos conciertos d’altor. El viernes 7 a les 20.30h van actuar Muyeres, que reestrenen l’espectáculu ‘Humanes‘ depués de tar dos años ensin xubir a un escenariu por culpa del andanciu. Per otru llau, Los Berrones entamen la xira del so 35 aniversariu que lleva por nome ‘Añu 1 DC (dempués del COVID)‘ y na que van tener collaboraciones nes actuaciones. Nel conciertu que van dar esti sábadu 8, tamién a les 20.30h, van tar acompañaos pola Banda de Música de Pravia.

Con estos conciertos, organizaos pola productora A Mansalva, la música asturiana va garrando normalidá dientro d’esta situación d’emerxencia sanitaria. Tovía queden entraes a la venta na web del Centru Niemeyer, con un preciu de 20 euros pal conciertu de Muyeres y de 24 euros pal de Los Berrones. Amás, los de Tolivia yá anunciaron les sos próximes actuaciones: sábadu 7 de mayu nel Escenario Santander, sábadu 4 de xunu na sala Capitol de Compostela, y sábadu 24 de xunu na sala La Riviera de Madrid.

Reestrenu de Muyeres
Muyeres ye un proyectu musical que nació en 1993 cola unión de muyeres procedentes de dellos grupos d’investigación etnográfica y l’oxetivu de reivindicar la música de percusión del país y el protagonismu de la muyer nel caltenimientu de la tradición sonora asturiana. ‘Humanes’ ye’l so últimu discu y un trabayu históricu na so trayectoria porque, per primer vez, nun compilen cantares tradicionales, sinón qu’axunten 13 canciones de composición propia. Les lletres homenaxeen a les humanes; a eses muyeres anónimes que fueron faciendo historia. La música ye ellaborada, con muncha calidá y esplora distintos soníos dientro del folk asturianu. L’espectáculu, estrenáu nel Teatru La Llaboral de Xixón en xineru 2020, amosó’l bon facer y la innovación de la formación; daqué que se caltién intacto con vistes al so reestrenu nel Niemeyer d’esti vienres.

Comprar discos de Muyeres y Los Berrones na tienda online