Fontoria asoleya en formatu dixital el discu A de ‘Sirio’
Esti vienres 7 de xineru asoleyó en Spotify y demás plataformes dixitales la primer parte del tercer álbum de Fontoria, ‘Sirio‘. Trátase del discu A, formáu por una única pieza instrumental de 74 minutos na que’l grupu piloñés de folk progresivu xuega cola esperimentación cola música de raigañu pa crear «una mecigaya de soníos que van dende los sones tradicionales de dellos llugares del mundu, a los ritmos electrónicos, la lírica, el rock progresivu o la música de cámara». como comenta Maxi Areñes, cabezaleru de la formación.
El discu B de ‘Sirio’ va salir el próximu 1 de febreru, nuna edición en formatu físicu que compila los dos CDs que formen esti trabayu. Areñes desplica que’l discu B «tien una duración de 50 minutos y ta enllenu de pieces d’orixe tradicional qu’aporten de llugares como Asturies, Bretaña, Escocia y, en xeneral, tol Arcu Atlánticu». Nél, tamién hai temes de composición propia, anque marcaes por tener «un calter tradicional», como sorraya’l músicu del grupu de folk progresivu.
La presentación en directo d’esti álbum se caracteriza tamién por tener numberoses collaboraciones -la soprano Susana Gudin (Taranus), el multiinstrumentista Pablo Canalís, los flautistes David Fernández y Iván Emo y el baterista Xosé Ánxel Allende-, va ser el próximu 5 de marzu en L’Infiestu, a les 19.30h, nun espaciu tovía por confirmar, anque dientro del circuitu d’Asturies Cultura en Rede.
Documental y cuartu discu
«Vamos facer un documental alrodiu la banda, cola música de ‘Sirio’, que sacaremos esti añu tamién, anque nun sabemos si incluyilo nel que sedrá’l cuartu discu -nel que yá tamos trabayando- y que va nomase ‘Goetia‘», esclaria’l músicu de Piloña sobre los próximos de Fontoria, banda que dende que se formó na primavera de 2017, nun apara. En 2019 debutaron con ‘Nordés’ -nomináu a los AMAS na estaya de “Mejor Canción Folk”- y en 2020 llanzaron ‘El máxicu viaxe de Fionna de Morlay’, tamién nomináu nos AMAS, anque esta vegada na categoría de ‘Mejor Disco Folk’. Col doble álbum ‘Sirio’ avancen nel so camín.
