La Banda de Gaites La Tarabica va participar na próxima edición del Festival Intercélticu de Lorient, unu de los mayores eventos internacionales dedicaos a la cultura celta, que se celebra cada branu na ciudá bretona de Lorient.
La formación de Guadarrama con raigaños asturianos va ser una de les bandes que va representar a Asturies nun certame qu’axunta a miles d’artistes y centenares de miles de visitantes, convirtiéndose nun escaparate de primer nivel pa la música y la tradición de los países celtes. La so presencia supón un importante pasu na trayectoria del grupu, que suma asina una nueva esperiencia internacional.
Dende la banda destacaron la relevancia d’esta cita, considerada la mayor reunión de naciones celtes del mundu, y una oportunidá única pa dar a conocer el trabayu que vienen desenvolviendo nos últimos años, asina como pa siguir afitando la presencia de la música tradicional asturiana nel circuitu internacional.
La participación de la banda nesti festival ye posible gracies a la collaboración cola Conseyería de Presidencia, Retu Demográficu, Igualdá y Turismu al traviés de la Dirección Xeneral d’Emigración y Polítiques de Retornu del Gobiernu d’Asturies. Amás, cunten col sofitu del Conceyu de Guadarrama, la llocalidá na que tán afitaos. D’esta manera, la Banda de Gaites La Tarabica súmase a una programación bien completa de la delegación asturiana nel Festival Intercélticu de Lorient, dirixida por Iñaki Santianes.
Suscríbite a les nuestres novedaes
