Esti sábadu 10 de xineru el Casinu de Llanes acueye ún de los primeros conciertos folk d’esti 2026. A les 19.30h y con entrada llibre van actuar Baxel, el dúu formáu polos fundadores de Corquiéu Paul Balmori (bouzuki y voz) y Rigu Suárez (flautes). Nesta ocasión van presentar el directo en formatu cuartetu (bouzouki, flautes, teclaos y percusiones) el so trabayu nuevu, Dayuri, un EP que continúa la filosofía del grupu de recuperar la tradición oral asturiana, reellaborándola y amestándo-y pieces de composición propia.
Dayuri ta formáu por dos temes, ‘La Lloquerada’ y ‘Sendadín en el muelle’. «‘La Lloquerada’ ye un tema tradicional recuperáu en Xuncu (Ribeseya) por nós gracies a la informante Estela Rosete«, desplica Rigu Suárez sobre la pista qu’abre l’EP. «Ye un cantar de viudos y viudes, que ye dalgo que nun sé si ye mui común n’Asturies, pero yo polo menos nunca lo sintiera. Y les cuartetes que cantamos son tal cual les recoyimos», afonda’l flautista sobre esti cantar qu’inclúi tamién «cachos del ‘Llixeru del gaiterín de L’Habana’» y dos melodíes compuestes por Suárez: «la qu’abre’l tema y la penúltima». Na parte del ‘Llixeru del gaiterín de L’Habana’ suena la melodía de ‘Villaviciosa Hermosa’, a la que-y meten la lletra d’una rabilada de Pandín el de Vibañu de Llanes cedida por Fé Santoveña «qu’al empar ye fía de Pandín el de Vibañu», esclaria’l músicu.
D’otra banda, ‘Sentadín en el muelle’ ye una suite instrumental vocal, daqué que sorraya’l músicu de Baxel y Corquiéu porque camienta que «ye la primer vez qu’un grupu folk fai falgo asina». Esti tema ábrese con un ad libitum de composición propia a la que-y sigue la melodía sele de ‘Dayuri’ pa dempués facer un «cambiu radical con una xiraldilla recopilada por Torner nel conceyu de Quirós». Esta última pieza ta iguada con una lletra d’Estefanía Moro sacantes l’estribillu, que respeta la lletra tradicional recoyida por Torner.
Con esti llanzamientu, Baxel continúa’l camín qu’abrieron en 2020: reellaboración de la tradición oral asturiana, dando a conocer temes inéditos o mui antiguos compilaos por ellos mesmos y col oxetivu de popularizalo a traviés de la música y de les histories qu’hai detrás d’estes melodíes. Una propuesta na que tamién hai sitiu pa les composiciones propies, respetando los patrones y ritmos de la música asturiana.
Dances, xiraldilles, xotes, muñeires, saltones, alboraes, valsiaos, fandangos… suenen nos temes d’esti dúu folk, que toca unos temes mui ellaboraos fechos pa sentir y baillar y nos qu’entemez rellaboración y composición propia. Too ello cola voz y bouzouki de Paul Balmori, una bayurosa combinación de flautes de Rigu Suárez y los teclaos de Richard García. Esti EP nuevu, Dayuri, ye una amuesa nueva del so bon facer.
Suscríbite a les nuestres novedaes
