Baxel y Algaire abren la edición 2022 d’Amosando
Vuelve Amosando, el ciclu de presentaciones de discos de música asturiana, con conciertos en formatu íntimu grabaos y emitíos llueu per Internet. Les novedaes de la edición de 2022 ye que van ser dos conciertos/grabaciones, cola participación d’un total de cuatro grupos; que l’escenariu va volver a ser Les Naves d’El Natahoyo; y que namás van tener invitación a ellos la xente asociao a L’Ensame de musicasturiana.com que gane’l sortéu. El domingu 22 de mayu a les 18h va ser el primer conciertu/grabación coles actuaciones de Baxel y Algaire, dos de los proyectos nuevos de la música’l país que más sonadía tán algamando. Los nomes de les persones ganadores de les invitaciones van anunciase’l miércoles 18 de mayu pela mañana.
Baxel ye un dúu de folk de cámara formáu polos componentes de Corquiéu Rigu Suárez (whistle) y Paul Balmori (bouzuqui). Nel so primer trabayu, ‘El Cantar del Simpatías’ reellaboren pieces tradicionales de Ribeseya. Xiraldilles, dances, xotes, alboraes, ramos o xotes suenen ente les diez pieces que dan forma a esti discu.
Algaire ye una banda formada poles pandereteres y cantantes Loreto Suárez, Iratxe Espina, Carla Miranda y el guitarrista Juan Yagüe. ‘Coral y Maera’ ye’l so primer discu, nel que faen música tradicional fusionada con estilos contemporáneos como’l pop, rock, electrónica o la música llatina, p’asina averar los sones de raigañu a nuevos públicos.
-
ALGAIRE – CD ‘Coral y Maera’12,00€
Actividá realizada cola ayuda de
