Yá ta na cai ‘Lluz’ de José Manuel Tejedor
Yá ta a la venta na tienda online y en toles plataformes dixitales ‘Lluz’, l’esperáu segundu trabayu en solitario de José Manuel Tejedor. Siete cortes dan forma a esti EP nos que’l pernomáu gaiteru afonda nel protagonismu de les melodíes, incorpora instrumentos qu’arriquecen el soníu de les pieces y graba per primer vez tres temes cantaos con dos collaboraciones mui especiales: la de Carlos Goñi de Revólver y la de Loreto Suárez d’Algaire. Tamién arriquecen l’álbum músicos vascos, irlandeses y asturianos: Ángel Miguel, Fani Moro, Gema Fernández, Juan Diego Gómez, Miguel Herrero y Horacio García.
«L’anterior discu yera muncho más puru. Intenté que fuera la mio esencia; pero nesti quiero reforzar muncho más la melodía», adelantaba José Manuel Tejedor a MUSICASTURIANA.COM va unes selmanes sobre la principal diferencia ente ‘Miraes‘ y ‘Lluz’. El resultáu ye evidente, con unes canciones más redondes y completes nes que xunto a los instrumentos de los sos músicos habituales –Richard García (teclaos), Juanjo Díaz (percusiones) y Juan Yagüe (guitarra)- y a les gaites y whistles de Tejedor, suenen instrumentos de viento mental, la concertina del irlandés Niall Vallely o la trikitixa d’Iñaki Plaza.
José Manuel Tejedor compuso ‘Lluz’ mentanto’l confinamientu, grabólu nos Tutu Estudios de Corvera baxo la producción de Sergio Rodríguez y financiólu gracies a una campaña de crowdfunding. Esti sábadu 14 de mayu a les 20h va presentalu nel Teatru Palacio Valdés d’Avilés nun conciertu perespecial nel que van collaborar dellos de los músicos que participaron nesti trabayu.
Más de dos décades de carrera
Con más de venti años n’activo nos qu’algamó los más prestixosos reconocimientos de la música tradicional, actuó per tol planeta col grupu Tejedor y fizo unos trabayos y collaboraciones que trespasaron fronteres y estilos; José Manuel Tejedor amuesa que tovía tien tien dientro muncha lluz creativa. Cola publicación d’esti segundu trabayu en solitario y tolo que va desendolcar los próximos meses, tien les ganes y la enerxía necesaries pa caltenela encesa.
