Yá ta na cai’l discu ‘Al Son del Cantar’ que se presenta esta tarde nuna gala en Castrillón

Yá ta en toles plataformes dixitales Al Son del Cantar, el discu resultáu del concursu escolar del mesmu nome entamáu pola Rede de Normalización Llingüística y la Conseyería de Cultura, Política Llingüística y Turismu. Diez destacaos artistes d’estilos que van dende’l folk a la electrónica, pasando pel rap o l’indie; dan forma a esti álbum que va presentase güei, a les 18.30h nel Centru Cultural Valey de Castrillón, dientro d’una gala na que se van dar los galardones a l’alumnáu ganador del certame.

El concursu Al son del cantar tien como oxetivu animar al alumnáu a presentar un cantar con lletra n’asturianu o gallego-asturianu escrita por ellos mesmos sobre una melodía tamién orixinal o sobre una melodía tradicional. Trátase d’un vía p’aguiyar l’aprendizaxe significativu del alumnáu al traviés de la investigación y la creatividá. Los cantares ganadores son llueu versionaos por formaciones de renome y editaos nun discu. L’antecedente d’esta esperiencia foi nel cursu 2018-201 col nome d’El mio cantar.

Pop Piquiñín, Toli Morilla, Calea, Tringuilintainas, Llevólu’l Sumiciu, Alfredo González, Bacotexo, Dani Stylo, La Bonturné y Gente Terrible fueron los encargaos d’adaptar y grabar estos temes pal compilatoriu y esta tarde los van interpretar nel Valey de Pierdasblancas na gala d’entrega de los galardones a l’alumnáu ganador del certame.

Intendisciplinar

Participaron na organización d’esta edición un total de 15 servicios de Normalización Llingüística de los conceyos d’Avilés, Candamu, Cangas del Narcea, Carreño, Castrillón, Corvera, Grau, Samartín del Rei Aurelio, Gozón, L.lena, Xixón y les mancomunidaes de la Comarca de la Sidra, Cabu Peñes, Comarca Ozcos-Eo y Parque Históricu del Navia; mesmo que les conseyeríes de Cultura, Política Llingüística y Turismu y la d’Educación.

Los alumnos y alumnes premiaos son de los centros CRA L.lena, CP Ramón de Campoamor (Xixón), IES Cangas del Narcea, CP Salvador de Vega Berros (Sariegu), CP Darío Freán Barreira (Coaña), CRA Cabu Peñes (Gozón), CP San Félix (Candás), CPEB El Salvador (Grandas de Salime), IES Peñamayor (Nava) y CP Virxe del Fresnu (Grau).

Mercar CDs de música pa la reciella