Tever publica’l so primer EP, ‘Suañu de Gaita’

Tres de dir llanzando dellos adelantos a lo llargo de dos años, yá ta en toles plataformes dixitales y a la venta en formatu físicu’l primer trabayu de Tever, Suañu de Gaita. Nél hai siete temes onde la música asturiana ximiélgase cola electrónica y otres maneres de sentir la gaita. Amás, como complementu del discu, el gaiteru asoleya un llibru coles partitures de tolos temes, un formatu bien popular n’otros países del Arcu Atlánticu y en músicos folk.

Esti trabayu supón l’entamu del taller d’innovación musical “Chalga” onde Tever ta faciendo varies llínees d’investigación como les flautes n’impresión 3D o’l desarrollu de ferremientes dixitales pa la enseñanza online de la gaita asturiana. Tamién supón un pasu más na trayectoria d’esti gaiteru qu’entamó a tocar l’instrumentu en 1998 col siempre recordáu mayestru gaiteru Manolo Quirós.

Fíu del boom de la gaita, ye tamién miembru de la Banda Gaites Camín de Fierro mayestru gaiteru, inxenieru informáticu y autoproductor de los sos propios proyeutos musicales. Como parte del so trabayu col desarrollu informáticu, tien dalgunos proyeutos empobinaos a la docencia musical utilizando teunoloxíes dixitales. Tres rabilar con nueves teunoloxíes como les impresores 3D o la circuitería ellectrónica con ferramientes como Arduino, apaez la idea musical d’asoleyar esti so primer trabayu en solitario.

Mercar ‘Suañu de Gaita’