En mayu de 2023 la ultraderecha entró con fuercia en distintes instituciones del Estáu español y, en cuantes tocó poder, entamó a censurar les espresiones culturales que nun comparten la so ideoloxía totalitaria. La respuesta nun tardó en llegar dende varios frentes y el Conceyu Mieres punxo en marcha una iniciativa pionera: Caja de Resistencia. Con ella, la conceyalía de Cultura programa a artistes que sufrieron la censura y ye dientro d’esti marcu col que’l próximu sábadu 22 de marzu van acoyer una edición especial del programa radiofónicu Carne Cruda nel que la música asturiana va tar presente.
A les 12 la mañana nel Pozu Santa Bárbara de Turón va facese la grabación d’esti programa empobináu por Javier Gallego -que tamién foi víctima de la censura dende Radio3- y nél van participar el cantante de Dixebra Xune Elipe, l’actriz mierense María Cotiello, l’artista Abel Azcona, la baillarina y coreógrafa Lola Eiffel y la conceyala de cultura de Mieres Rocío Antela. Xunto a Gallego van aldericar y analizar lo que supón la censura dientro del arte y de la cultura. Tamién va haber una actuación de Pablo Und Destruktion.
Les entraes son de baldre pero l’aforu ye llimitáu. Pueden acutase a partir d’esti sábadu 15 de a les 12 la mañana na Casa la Cultura a traviés d’esti enllaz: https://CAJAdeRESISTENCIA_Especial_CARNECRUDA.eventbrite.es
Suscríbite a les nuestres novedaes
