El sábadu 15 de marzu, Mapi Quintana, Rubén Bada y Marcos Baggiani xubieron al escenariu del Pozu Santa Bárbara pa facer vibrar al públicu col so espectáculu Working Class, un conciertu perespecial travesáu pol arguyu de ser clase obrera nel que sonaron delles versiones de música latinoamericana y asturiana, amás de composiciones propies, en clave d’improvisación. Esta mañana’l proyectu estrenó un videu na canal de Musicasturiana en YouTube cola so interpretación en directo nel PZSB del cantar ‘Construção’ de Chico Buarque. Falamos con Mapi Quintana p’afondar nel llabor musical y de producción que ficieron pa llevantar Working Class, la importancia d’esti cantar, el conceptu qu’hai detrás y muncho más.
¿Por qué decidistis escoyer esti momentu del conciertu y esti cantar como exemplu del espectáculu?
‘Construção’ ye l’arreglu que más s’asemeya a como queremos sonar nesti proyectu. Ye un arreglu diferenciáu del orixinal, de Rubén, y ye la llinia na que queremos siguir trabayando. Los otros cantares igual suenen más apaecíos a la so versión orixinal, pero esti ye’l que más nos representa musicalmente.
Munchos de los cantares qu’interpretáis en Working Class son versiones d’otros artistes, como esti ‘Construção’ de Chico Buarque, ¿cómo vos averastis a la so música?
Chico Buarque ye un cantautor brasileñu que yá llevo sintiendo dende va munchos años y ye ún de los mios preferíos de la música de Brasil. Esti cantar venía-y que nin pintáu a Working Class. Dende que conozo’l cantar siempre me prestaba ver si lu podía facer en dalgún proyectu, pero nunca se dio’l casu de que lu pudiera acoplar pola temática de los proyectos que tuve hasta agora. Alineáronse los astros por fin y espetámoslu p’allá.
L’orixinal de ‘Construção’ ye una obra maestra y pémeque tener reproducío esi cantar dando-y otru aire, como conseguimos da-y, quitando-y tol orquestéu que tien na versión orixinal… Yo toi mui arguyosa del trabayu que ficimos, quedónos mui personal, mui de nós tres. Nesti casu, como yá comentara, l’arreglu ye de Rubén Bada, de la parte de violín, que ye onde va tola carga armónica, ye’l centru de la nuestra versión, onde vamos desarrollando tolo que vamos faciendo Marcos y yo.
«L’orixinal de ‘Construção’ ye una obra maestra y toi mui arguyosa de reproducir esi cantar dando-y otru aire, quitando-y tol orquestéu que tien. Quedónos una versión mui personal»
¿Vais asoleyar más pieces de Working Class?
Espero que sí, espero que sí. Vamos sacar un teaser tamién, pero esta ye la única pieza que tenemos entera del estrenu. Cuando avance un poco más el proyectu, igual podemos facer dalguna grabación más en directo y, a lo meyor, ponenos creativos y facer un videoclip.
N’Asturies vense pocos conciertos con una producción tan completa y trabayada (vestuariu, proyecciones y escenografía, sitiu, semeyes promocionales, grabación del directu, etc.), ¿por qué decidistis embarcavos nello d’esta manera?
Col tiempu, en tolos años que llevo de carrera musical, fui deprendiendo munchísimes coses, non solo musicales, sinón estramusicales. Y deprendí a ver el valir que tien tolo estramusical: vestuariu, proyecciones, escenografía, el sitiu, promoción… Tolo visual ye lo primero que recibe l’espectador o espectadora; entós, nun podemos dexar eso al azar o nun cuidalo, porque ye información que llances dende l’escenariu. Un espectáculu ye un pack de tolo visual, tolo que sientes -lo musical-, y tamién tolo que fales, la comunicación oral. Les tres coses son casi igual d’importantes.
La música ye, obviamente, colo que meyor m’arreglo y a lo que más tiempu-y pongo. Tolo demás queda en manes de profesionales. Pa facer les lluces llamamos al meyor illuminador d’Asturies; pa facer los visuales contamos con Diego, que ye un crackísimu; el soníu; la escenografía; el sitiu tenía que ser el Pozu Santa Bárbara por toles connotaciones qu’implica; y asina, too. A estes altures de la mio vida nun entiendo facer un espectáculu onde toes eses otres coses estramusicales nun tengan sitiu.
«En tolos años que llevo de carrera musical fui deprendiendo’l valir de tolo estramusical. Lo visual ye lo primero que recibe’l públicu y nun podemos nun cuidalo. La música ye a lo que más tiempu-y pongo y tolo demás déxolo en manes de profesionales»
¿Cómo foi’l procesu?
Lo primero que tuve claro fue lo que quería contar: el día que pongo una camiseta d’Asturies Working Class de Puru Remangu siéntome mui representada, y entiendo qu’hai muncha más xente como yo que formamos un colectivu que ye una xeneración de fíos d’obreros col tiempu que nos tocó vivir, con tola migración… Eso quiero contalo y compartilo -amás, paezme util facelo-; entós, tengo una misión, contar esta movida.
A partir d’ehí busqué’l repertoriu -que corrió de la mio cuenta-, entamamos a ensayar y dalgunos arreglos fícelos yo y otros, Rubén. Esi procesu creativu a la limón prestóme muncho porque normalmente soi yo la que fago tola música que se toca nos mios proyectos, o’l 90%. Esta vez fue más a medies y prestó pola vida.
Dempués, col restu de coses, una vez entendíes toles demás necesidaes, fui delegando en profesionales de cada rama, intentando contar cola xente que conozo que meyor sabe facer caúna d’eses coses y dexándome asesorar. Por exemplu, col tema de los visuales fue Rubén Rayán -el técnicu y diseñador de la illuminación- el que dixo que necesitaba unos visuales poles característiques del sitiu, y recomendóme llamar a Diego Flórez. Pal vestuariu trabayé con una modista y diseñadora de confianza. Too xente cola que yo tengo una conexón fuerte a nivel personal. Esi fue’l procesu.
«Lo primero que tuve claro fue lo que quería contar. A partir d’ehí busqué’l repertoriu, entamamos a ensayar y dalgunos arreglos fícelos yo y otros, Rubén. Esi procesu creativu prestóme muncho»
Sobre les proyecciones, ¿quién s’encargó de grabales y diseñales, y qué amuesen? ¿Qué pensáis qu’aportaron al conxuntu del espectáculu?
Los visuales, como yá comenté, fízolos Diego Flórez. Ye un mozu de la Cuenca qu’asoleyó un curtiumetraxe l’añu pasáu que se llamaba Una lluz y dimos con él porque Rubén Rayán violu y encantó-y la so manera de trabayar. Suxirió que los visuales de Working Class podía facelos él porque diba entender el proyectu perfectamente, y nin lo cuestioné. Cuando lu conocí, dixi-y: ta nes tos manes, nun te voi pidir que me mandes pruebes; apurre la to visión d’esto, pon tol to arte a furrular y crea lo que te preste a ti. Namás-y dixi que me prestaría qu’hubiere colomines y vivienda obrera porque yera una parte perimportante del conceptu que nun teníemos contemplada nin na música nin nel vestuariu. Fízome casu y, amás de les colomines, apaecieron muches otres coses maraviyoses. Aportó un saltu de calidá a too esto brutal, son una preciosidá y faen que la música gane muncha intensidá.
«Los visuales fízolos Diego Flórez. Namás-y dixi que me prestaría qu’hubiere colomines y vivienda obrera porque yera una parte perimportante del conceptu que nun teníemos contemplada nin na música nin nel vestuariu. Aportó un saltu de calidá brutal, son una preciosidá y faen que la música gane muncha intensidá»
Working Class quier celebrar l’arguyu obreru, pero, a la fin, como tu mesma decíes esi día, nun quier romantizar tolo qu’enfrentamos nel mundu llaboral acaldía que, nel casu del personaxe d’esta canción, llega hasta un accidente mortal…
Sí, sí, ye mui importante que quede claro que nun tamos romantizando la clase obrera; nun tamos romantizando la esplotación, la probeza, la miseria, les inxusticies; naide quier vivir asina. Pero toes eses penuries tamién moldeen a les persones d’una manera onde la dignidá ye prioridá, onde la llucha ye una prioridá, nun dexase atropellar y querer que’l mundu seya un sitiu meyor y más xustu, eso nos lo da’l pasar miseries. Esi ye l’arguyu que yo siento, el deprender esos valores. ¿Hebo que deprendelos a hosties? Sí, eso sobrábanos. Esta xeneración nuestra que yá nun trabayamos nes fábriques, que fuimos a la universidá, pudimos viaxar y ver cómo se faen les coses n’otros llaos, fáenos danos cuenta de qu’hai coses que facemos meyor que n’otros llaos y otres, peor, pero tenemos unos valores fuertes de dignidá y llucha. Yo tengo un arguyu inmensu de medrar con eso.
El tema de Chico Buarque -‘Construção’- yá nun pon namás de manifiestu que se mata un paisanu trabayando, que ye una traxedia tremenda, sinón qu’hai dalgunes frases nel cantar que son mui tremendes. «Matóse, cayó en medio la carretera torgando’l tráficu». Menudu problema, máteste y torgues el tráficu, o sea, das pel culu. Quiero dicir qu’esi cantar lo que ta poniendo de manifiestu ye en qué sociedá vivimos, qu’hai un accidente, mátase un paisanu y fastídianos porque nos torga’l tráficu, el sábadu, nun nos dexa llegar a Parque Principao porque hai un atascu por culpa d’eso. Esa canción ye mui fuerte a munchos niveles. Ye pa escuchala tranquilamente y recomiendo mui muncho sentir la orixinal.
«Ye mui importante que quede claro que nun tamos romantizando la clase obrera; la esplotación, la probeza, la miseria, les inxusticies. Pero toes eses penuries tamién moldeen a les persones, la dignidá y la llucha son prioridaes, querer que’l mundu seya un sitiu meyor y más xustu. Esi ye l’arguyu que yo siento»
N’Asturies, los estilos que suelen ocupase d’esti tipu de reivindicaciones tán al rodiu del punk y del rock, o -‘otra época- el Nuevu Canciu Astur, ¿qué matices aporta la esencia musical d’esti proyectu a esi discursu colectivu?
Pues una estética más, unímos a esa llista d’estilos. Esto que facemos nós en Working Class nun ye jazz, pero sí qu’hai bastante improvisación y bastante enredar coles formes y les estructures de los cantares, abriendo espaciu pa improvisar. Entós, bueno, simplemente apurrimos esta manera d’entender la música a una temática que nos llega mui cerca.
«Toi mui satisfecha a nivel artísticu, lloxísticu y d’equipu. Tola xente que ficimos Working Class esi día punximos muncha seriedá, respetu y cariñu. Creo que tolos temes taben fechos perbién y comunicamos lo que queríemos»
Pa finar, ¿qué valoración facéis del estrenu del espectáculu nel Pozu Santa Bárbara l’otru día? ¿Cómo foi l’acoyida del públicu?
Como valoración final, a nivel artísticu, lloxísticu y d’equipu, toi mui satisfecha, mui contenta. Ficímoslo too con una seriedá, respetu y cariñu brutales. Tola xente, tol equipu que ficimos Working Class esi día. Pa min ye una satisfacción personal mui grande tenelo fecho nel Pozu Santa Bárbara y el Conceyu volcóse dafechu con esto. Toi mui feliz a tolos niveles y creo que tolo que se fizo musicalmente ta bien fecho. Sí que ye la primer vez que llego a un estrenu ensin llegar a la meta que yo marcara; faltóme un tema ensin terminar y tengo esa espinina ehí. Pero bueno, creo que tolos temes que presentamos taben fechos perbién y creo que comunicamos lo que queríemos contar, entendióse bien y toi mui contenta.
Suscríbite a les nuestres novedaes
