Esti sábadu 20 de setiembre, el programa Xuntanza va emitir na TPA el so octavu capítulu, y pa ello va cuntar cola collaboración de Rubén Bada como presentador del mesmu. Esti capítulu preséntase como un programa para cellebrar la música al traviés de quienes la viven, la reinventen y la tresmiten. Pol plató van pasar la Banda de Música de Pravia, la cantante Marina Carbajosa xunto al gaiteru Diego Fernández, la cantante Mapi Quintana, Eva Tejedor, Ferla Megía y’l flautista Pepín de Muñalén.
Pol sofá de ‘Xuntanza’ van pasar Tino Cuesta, direutor de la Banda de Música de Pravia, Marina y Diego, respresentando a la nueva xeneración de la escena tradicional, y Mapi Quintana, cola que Rubén trabaya nel proyectu ‘Working Class’. Eva Tejedor tamién va tar falando sobro la so visión de la música tradicional, y l’artista Ferla Megía va tar desplicando como fae una música distinta que mezcla lo tradicional, colo urbano y lo ellectrónico.
Rubén Bada ye ún de los músicos de folk asturianos con mayor proyeición internacional. Vigulineru, guitarrista y conocíu principalmente por tocar el bouzouki, collaboró con grupos como Corquiéu, N’Arba, Dixebra… Foi miemrbu de DRD, Xéliba, L-R, y anguañu ta a piques de sacar el so primer discu en solitariu, amás de continuar col grupu Calea, y collaborar con una montonera grupos y agrupaciones na escena asturiana, ente los que se cunta Rodrigo Cuevas cola xira ‘La Romería’.
Suscríbite a les nuestres novedaes
