La selmana que vien el tríu astur-andaluz Deira aporta al prestixosu festival Kaustinen Folk de Finlandia, el más grande eventu de música popular de los países nórdicos, que lleva celebrándose dende 1968. Ellí van actuar los díes 16 y 17 de xunetu; amás el sábadu 18 van poner un taller de folk asturianu, contribuyendo a internacionalizar la música asturiana y facer que se conoza acullá de les nuestres llendes.
«Va ser l’únicu festival que faigamos esti branu, yá que la banda ta faciendo agora mesmo un paréntesis. Esto débese a la reciente paternidá de Juan y a la marcha de Gonzalo a Galway (Irlanda) onde ta particiando mui activamente en sessions y conciertos. Salvador pela so parte ta centráu nel so proyectu de vigulín electrónicu», despliquen dende la formación. Sicasí, pesie al parón, afrimen que tán «componiendo con vistes a grabar un trabayu nuevu’l próximu añu«.
Deira ye un tríu folk formáu pol xixonés Gonzalo Llao (bouzouki) y los andaluces Juan Almaraz (flauta) y Salvador Daza (vigulín). En 2023 asoleyaron el so primer discu: Alba. Nél, el grupu reflexa toles esperiencies que vivió durante la xira qu’entamaron tres ganar el concursu The Battle of the Folk Bands nel Celtic Connections en 2022, convirtiéndose asina nel primer grupu non escocés qu’algamó’l primer puestu.
D’entós pacá, la banda tien tocao en dellos de los eventos más importantes de la música folk, amosando una propuesta que, según el grupu, presenta «un soníu modernu a traviés de composiciones propies na so mayoría, anque teniendo siempre presente’l folk asturianu y escocés».
Suscríbite a les nuestres novedaes
