Les primeres imáxenes en movimientu que recueyen el fechu musical asturianu son de les primeres décades del sieglu XX. Asina, gracies al éxitu que teníen ente la emigración los documentales con vistes de llugares y romeríes asturianes surdieron películes como Llanes 1917, un reportaxe de cine mudu sobre esta villa del Oriente y onde apaecen imáxenes del xuegu de los bolos, un concursu de baille del pericote y delles dances de la zona, amás de la filmación d’un gaiteru. Foi la primer vez que la música asturiana recibió l’atención d’una pieza audiovisual. Una rellación que, a pesar d’apaecer nes pantalles a cuentagotes, allargóse hasta los nuestros díes, más d’un sieglu depués, y nel 2023 podemos dicir que se produció la so normalización definitiva.
«La música asturiana foi apareciendo de forma interminente na incipiente industria audiovisual asturiana del cine mudu. Esta ye la protohistoria de la nuestra música nel audiovisual»
La música asturiana foi apareciendo de forma interminente na incipiente industria audiovisual asturiana del cine mudu, como en Mieres del Camino, un mediumetraxe de ficción dirixíu por Juan Díaz Quesada en 1927 que narra una historia d’amor marcada poles clases sociales y el carbón y onde se pueden ver dellos bailles del país. L’apaición del cine sonoru y la Guerra Civil valtaron los pegollos de la prolífica cinematografía asturiana. Sicasí, en 1941 estrenóse Porque te vi llorar, un llargumetraxe de ficción dirixíu por Juan de Orduña que recueye imáxenes d’unes moces cantando un ramu en Llanes. Podemos dicir qu’esta ye la protohistoria de la nuestra música nel audiovisual, porque nesa mesma época’l cineasta Justo de la Cueva rodó cola productora Cifesa cuatro reportaxes de temática asturiana, ente ellos El corri-corri: Cabrales (1942) y Romería asturiana (1942), filmáu en Llanes y qu’inclúi na so banda sonora cantares tradicionales. Coles actuaciones musicales equí incluyíes la historia del videoclip asturianu entró na so Edá Antigua.
Otra manera, no que tien que ver cola ficción, el cine español del franquismu tuvo dellos intentos de reflexar la identidá asturiana dientro de la pantalla. Exemplu d’esto ye Altar mayor (Gonzálo Pardo Delgrás, 1943), melodrama rodáu en Cuadonga que tien na devoción de los asturianos a la Santina’l tema central. La película inclúi la primer escena musical de la historia del nuestru cine, onde nun chigre interpreten una vaqueirada Miranda, Cué, Suárez, Tuero y Vila. Una escena que ta al altor de cualquier performance incluyida en Mamma Mía o La la land. Mentanto, en 1952 estrenóse Ronda española (Ladislao Vadja), sobre una xira per América de los Coros y Danzas de la Sección Femenina. Esti llargumetraxe inclúi delles escenes musicales nel so argumentu, ente elles la interpretación d’una versión del pericote. Per otru llau, el noticieru franquista No-Do tamién recoyó en dellos reportaxes la nuestra cultura musical, anque pasada pela peñera de los Coros y Danzas de la Sección Femenina. Exemplu d’ello son No-Do 035: Corri-corri (Las Arenas, Cabrales, Asturias, 1961), No-Do 126: Danza Palo del Avellano (Moreda, Asturias, 1972) o No-Do 101: El Regodixo (Boal, Asturias, 1972).
No que se refier a la televisión, TVE emitió nos últimos años de la dictadura programes dedicaos al folclor de les «regiones españolas». Ente estos destacaron l’espaciu que Con acento dedicó a la nuestra tierra en 1969, onde xunto a reportaxes de la siderurxa y la mina, incluyóse la estrena del videoclip míticu de Los Archiduques grabáu en Santa María del Naranco, amás de bailles típicos y cantares tradicionales interpretaos pol Coru Mineru de Turón, el Grupu Folclóricu de Llanes, el Grupu de Dances d’Educación y Descansu de Xixón, la Coral Polifonica de Xixón, la Escolanía de Cuadonga, la Sección Femenina de L.luarca y los cantantes de tonada Juanín de Mieres y L’Abogáu. Per otru llau, en 1973, Ventana abierta, un programa financiáu pola Junta Central de Información, Turismo y Educación Popular, tuvo centráu nel llugar de Miranda y nél apaez el grupu Madreselva, qu’interpreten dos cantares en dellos paisaxes d’esta parroquia avilesina. Otra manera, tuvieron bien d’éxitu espacios como Ronda de España o Cantando se hace camino, protagonizaos pola cantante sevillana Antoñita Moreno y onde -cola collaboración y asesoramientu de los Coros y Danzas- l’artista facía un percorríu pel folclor ibéricu. Destaca’l capítulu dedicáu a Asturies emitíu en 1977, onde la cantante interpreta los temes «Dos ablanes», «Vaqueiras», «Brisas del Norte», «San Juan y la Madalena» y «Carretera de Asturias». Estes pieces audiovisuales, anque inconexes ente sí, ye otru exemplu de lo que podría dar de si un cine musical de raigañu asturianu. Con too, el programa de más importancia de la dómina dedicáu al folclor peninsular ye Raíces, espaciu documental de TVE que tuvo n’antena ente 1972 y 1983 y que dedicó dellos capítulos a la nuestra tradición musical. Amás de les úniques grabaciones en movimientu de José Remis Ovalle, l’espaciu recoyó delles actuaciones de los Coros y Danzas de la Sección Femenina coles sos peculiares performances del folclor asturianu.
Col dictador dando les boquiaes, en 1974 produciéronse dellos fechos que diben cambiar la historia d’Asturies. Per un llau, fundóse l’asociación Conceyu Bable, que puxó por esparder la idea de qu’esti país yera una comunidá con cultura y llingua propies, echando a andar al rau d’ello un importante movimientu llingüísticu y lliterariu que diba ser fundamental p’articular Asturies como ente políticu. Per otru, el Centru Territorial de TVE-Asturies estrenó l’informativu Panorama Regional, que se convirtió nel primer espaciu de la naciente televisión asturiana. Depués de la muerte del dictador y l’aniciu de la Transición política, Asturies tamién recuperó les sos instituciones d’autogobiernu y echó andar l’Academia de la Llingua. Amás, cola fin de la dictadura suprimióse la censura previa y permitióse l’usu de les otres llingües del Estáu nes obres audiovisuales.
Al contrariu de lo que pasó nes reconocíes como nacionalidaes históriques, la puesta en marcha de la nuestra autonomía nun supunxo’l surdimientu d’una política audiovisual como preséu de recuperación identitaria. Con too, les desconexones de TVE-Asturies dexaron un güecu pa la nuestra música y yá formen parte de la memoria colectiva los videoclips en 16 mm de «Dios te llibre de Castiella», «Atiendi, Asturies, atiendi»; y «So vaqueiru» que’l grupu Nuberu grabó pa la televisión española. Per otru llau, ente 1989 y 1991 TVE-Asturies emitió Canción Asturiana, un programa presentáu y dirixíu por Carlos Jeannot centráu na recuperación de la nuestra música tradicional. L’espaciu foi un éxitu y emitiéronse 98 programes que percorrieron tola xeografía a la gueta de los cantares y bailles del país. Amás de muestres de folclor tradicional y canción asturiana, grabáronse delles actuaciones d’interpretes de pop llariegu como Vicente Díaz, Almas Unidas, Cholo Juvacho o’l Duo Costa Verde que punxeron les bases pa lo que diba llegar nes décades siguientes.
Con Nuberu y Canción Asturiana el videoclip n’asturianu fíxose adolescente, pero con Los Berrones llegó a la edá adulta y independizóse. Gracies al fenómenu de los de Llaviana n’Asturies y nel restu del Estáu, el grupu grabó los sos primeros videoclips; «Calcar na tená» y «La de les vacaciones». Nos noventa vendríen tamién «Rigu Esva» de Llan de Cubel, «Estrelles ensin nome» d’Avientu o «Tamos fartos» de Lliberdón, amás del «Nun llores» de Dixebra, que la dirección de TVE-Asturies negóse a emitir pol so conteníu a favor de les lluches obreres de Duro Felguera. Con too, l’espoxigue definitivu vieno col sieglu XXI, con una producción constante de pieces audiovisuales que tienen a la música asturiana protagonista. Podemos reseñar «El manteru», «Blancos andantes» y «Sigue’l tren» de Dixebra, a los qu’hai que sumar «La nada y tu» o «L’asturianu conéctate» d’Alfredo González, «Llunáticos» de Tejedor, «El canciu les mentires» de Bueno, «Suañaba yo» y «Menudu talibán» de Los Berrones, «Llárimes» y «Llandellena» de La Col.lá Propinde, «Na caleya» y «A la vera del borín» de La Bandina, «Siempre fiel», «La Cárcel» y «Foriatu na mio ciudá» de Misiva, «N’asturianu, sumes» de David Varela, «Espoxiga», de Pop piquiñín, «La familia del asturianu crez» de Nacho Fonseca, «Ella nun escaez» y «Entaína» de Skama la Rede, «La foguera» de Skontra, «Verdiciu» de Rodrigo Cuevas, «La mesma revolución» de Silvia Quesada, «Ensin ti» de Taranus, «La ñeve y la esmeralda» de Luis Nuñez y los Folganzanes, «La fonda de Lola» d’Héctor Braga, «Sombres sobre la yerba» de Lafu & Rebeca, «La saya» y «Escaecimientu» de Felpeyu, «La Y» d’Eva y les Pandereteres o «Campos de meiz» y «Queimar el cielo» de Bacotexo, por citar los qu’existen en gallego-asturianu.
«Con Nuberu y Canción Asturiana el videoclip n’asturianu fíxose adolescente, pero con Los Berrones llegó a la edá adulta y independizóse. Con too, l’espoxigue definitivu vieno col sieglu XXI, con una producción constante de pieces audiovisuales que tienen a la música asturiana protagonista»
Per otru llau, nel 2005 estrenóse «Divina Lluz», un llargumetraxe de Ramón Lluis Bande qu’adapta llibremente el trabayu discográficu del mesmu nome del grupu Mus, entemeciendo ficción, documental y videoclip. Otra manera, nel 2018, el grupu asturllionés D’Urria presentó «La lienda», un curtiumetraxe musical dirixíu por Héctor Menéndez Aneiros ambientáu na Guerra Civil y que cuenta la historia de tres republicanos asturianos qu’intenten volver pa Cangas dende Vil.lablinu depués de lluchar en Madrid contra los fascistes. Per otru llau, nel 2022, el Gobiernu Asturinu punxo en marcha’l proyectu audiovisual Asturias sonora, que pretende xuntar la música fecha n’Asturies coles paraxes naturales y los equipamientos más emblemáticos d’esta tierra. Trátase d’un total de diez videos musicales de dalgunos de los artistes más significativos de la escena asturiana, grabaos n’enclaves naturales o culturales de gran importancia. Ente los participantes que cantaron n’asturianu taben Silvia Quesada con «El caxón», Mapi Quintana y La Maramoniz con «Danza Pin-Pin», Eva Tejedor y les Pandereteres con «Setiembre», Ún de Grao con «Texeora de Bayo» y L-R con «Agarráu de Tresmonte». Per otru llau, nel 2021, la Dirección Xeneral de Política Llingüística principió a financiar los videoclips de los temes ganadores del Premiu Camaretá al Meyor Cantar. D’ehí salieron les pieces de «Rambalín» de Rodrigo Cuevas y «El que conoz a tierra» de Carla Armas y Rubén García.
«Nel 2021, la Dirección Xeneral de Política Llingüística principió a financiar los videoclips de los temes ganadores del Premiu Camaretá al Meyor Cantar»
Con too, el que diba marcar un puntu aparte diba ser el videoclip de «Rondo Fem». Trátase d’un tema d’Algaire que fala de la llucha de les muyeres pola igualdá y con una pieza audiovisual qu’axunta delles histories en delles époques marcaes pol machismu de la sociedá. El videoclip atropa 15.000 visites en YouTube. Con too, l’españíu definitivu del audiovisual musical n’asturianu foi nel 2023. Esi añu, Calea estrenó «Piedras», pieza que xuega a ser una grabación familiar en Super-8 d’un domingu en monte, mentes que L-R presentó «Anda neña (xota, ou dalgo)», nel que muestren una muyer hiperfeminizada y un home impasivu, reproduciendo con dalgo de chancia los roles del heteropatriarcáu. El grupu formáu por Leticia Baselgas y Rubén Bada tamién estrenó «Trébole (Llixera)», nel que xueguen col BDSM y lleven la tradición musical asturiana al perréu, y «Menodito», onde beben del cine negru americanu de la época dorada de Hollywood y de les sos escenes nocherniegues illuminaes poles lluces d’un coche. Nel 2023, Ún de Grao tamién presentó «Viva Grau», versión del popular tema onde l’artista percuerre dellos requexos de la villa moscona, mientres qu’Héctor Braga fixo lo propio con «Llobatu», que fala d’un neñu que se convierte nun home llobu y anda pelos montes del Oriente d’Asturies. Otra manera, Algaire publicó «Llume», cantar a comuña col grupu bretón Ahez, representantes de Francia n’Eurovisión 2022, con un videoclip que reivindica’l derechu de les persones LGTBI a construyir una familia, mentes que «Coral y maera» ye un productu audiovisual que’l grupu de pandereteres protagonizó depués de ganar el Premiu Camaretá. Nel videu fálase de les dificultaes pa superar una historia d’amor qu’acabó. Con too, el pasu de xigante pa la industria del videoclip n’asturianu producióse gracies a Rodrigo Cuevas y la estrena de tres videoclips: «Más animal», «Casares» y «Cómo ye». El primeru xuega colos roles de la masculinidá na sociedá tradicional amestándolo a la estética de la icónica Madonna noventera, mientres que’l segundu bebe de la mitoloxía asturiana pa falar de les polémiques que xenera la fauna montesa na sociedá rural. P’acabar, «Cómo ye» utiliza técniques d’animación pa narrar les ganes d’entamala que lleguen cola época estival. Tres pieces que formen parte de la historia del videoclip n’asturianu. Una historia que principió nos ochenta y que s’afitó col sieglu XXI, pero con unes blimes que se fixaron hai más de cien años, na época del cine mudu.
Suscríbite a les nuestres novedaes
