‘Al Son’ de RPA dedica dos capítulos a la vida y obra de Torner
L’espaciu Al Son, que s’emite tolos llunes a les 23:30 hores y tamién puede sentise na sección ‘A la carta’ en www.rtpa.es, va dedicar dos capítulos d’una hora de duración a tratar la vida y la obra del musicólogu uviedín Eduardo Martínez Torner.
Van salir a les ondes los díes 14 y 21 d’esti mes de marzu y nellos fáise un percorríu fondu pela vida de Torner y pel tiempu azarientu que-y tocó vivir. Un pelegrinaxe vital nel qu’ocupó bien de cargos institucionales rellacionaos cola música y la educación y que, pola so condición de republicanu, llevólu a un campu de refuxaos en Francia, d’au saldría pa exiliase en Londres.
La so abondosa obra, les sos investigaciones sobre la música culta y popular, los sos métodos de clasificación y análisis de la música tradicional y la so xera divulgativa y pedagóxica faen d’él una figura imprescindible de la musicoloxía a nivel internacional.
Al mesmu tiempu, como complementu musical, nestos dos capítulos van poder sentise delles de les pieces que recoyó nel so Cancionero de la Lírica Popular Asturiana reellaboraes por solistes y grupos asturianos de les últimes décades, prueba de la vixencia d’esta obra y de la importancia que tien pa la cultura asturiana.
