Dixebra ultima’l so discu nuevu nel pueblu l.lenizu de Chanos

La banda avilesina de rock Dixebra ta estos díes rematando les canciones que van formar parte del so trabayu discográficu nuevu, que fai’l númberu 17 y lleva por títulu Ente la niebla.

Los últimos detalles y arreglos de les canciones tán faciéndolos nel pueblu l.lenizu de Chanos, d’au ye orixinariu’l guitarrista y principal compositor del grupu Primi Abella. Nesi llugar montaron un pequeñu set de grabación onde fundamentalmente tán dando acabación a la parte vocal del discu, grabando les maquetes previes a la entrada nel estudiu, que previsiblemente va ser a la vuelta del branu.

Esta producción nueva de Dixebra trátase d’una obra conceptual mui especial, onde los cantares xiren alredor de la memoria histórica o colectiva de los asturianos y asturianes. La so idea ye tratar temáticamente la historia del pueblu asturianu del últimu sieglu, esto ye, dende la industrialización del país y el surdimientu d’una clas proletaria asturiana. Al traviés de les lletres van tratase asuntos como la toma de conciencia política, les primeres lluches obreres, l’autoorganización, la emigración, la Revolución d’Ochobre, la guerra contra’l fascismu, la represión, l’exiliu, los fugaos, la fuelgona del 62, el paternalismu franquista, la transición, la reconversión industrial, les movilizaciones del naval, la llucha de les muyeres d’IKE, la mafia sindical, el desencantu o les movilizaciones actuales.

Trátase d’un trabayu monográficu sobre la historia y la memoria de clas obrera asturiana

Ente la niebla va presentase en formatu llibru-cd, nel que van collaborar periodistes, escritores, profesores, historiadores, ilustradores, dibuxantes… que, coles sos creaciones, van reflexonar sobre’l pasáu, el presente y el futuru de la clas obrera asturiana. Y ye que la evolución histórica de les clases populares y trabayadores d’esti país son parte fundamental de la nuestra idiosincrasia como pueblu y una seña d’identidá con una potencia como poques.

Precisamente en socedíos, paisaxes y personaxes del pueblu de Chanos, que se tomen como exemplos de toa Asturies, tán basaos dellos de los testos de les composiciones nueves de la banda. La previsión ye entrar a la vuelta del branu nos Tutu Estudios de Corvera, baxo la producción de Sergio Rodríguez, pa grabar esti discu nuevu, que va poder sentise a finales d’añu.

Comprar discos de Dixebra na tienda online

Dexa un comentariu

X