En poco más d’un mes arranca la segunda edición de Música en Rede. Alcuentru profesional, les xornaes dedicaes a la industria musical qu’entama la Conseyería de Cultura, Política Llingüística y Deporte a traviés de Cultura en Rede. Llaboral Ciudá de la Cultura de Xixón va acoyer del 8 al 10 d’abril esti eventu pal que yá hai un primer avance de la programación: doce showcases diez charres y talleres; amás de los alcuentros comerciales, presentación de proyectos y los «almuerzos y espicha en rede«. Quien quiera participar nel eventu tien qu’inscribise nesti formulariu enantes del domingu 23 de marzu.
Ente los showcases tán confirmaes les siguientes propuestes artístiques venceyaes a la música n’asturianu: Llevólu’l Sumiciu, Vérsica, Vero Rubio, Alienda y Herbamora -tamién toquen otros proyectos que nun canten na llingua autóctona: De Fem, María Diaz, The Soulers, Blues&Decker, Marco Martínez Trío, Akin&The Afrobeat Brothers y Maimuny-. Toles actuaciones van ser de baldre y van facese de martes a xueves, ente les 18.30h y les 21.30h nel Paraninfu y nel Teatru de La Llaboral.
D’otra banda, tamién s’anunciaron los nomes de les charres que va haber dientro d’ERBÍES (sesiones formatives), y COXUSTES (meses d’alderique). Va haber tres sesiones formatives: Celtic Connections & Festival Interceltique de Lorient: dos modelos d’éxitu; Financiamientu autonómicu pa la música n’Asturies; y DIY 101: Claves pa empezar cola autoxestión musical. Los coloquios van ser siete: Ciudaes musicales y turismo musical: un futuru sostenible p’Asturies; Entornos dixitales y música: fórmules de comunicación nueves; Una asociación nueva de mánagers musicales pa España; Dende Asturies al mundu: 3 exemplos dende lo local; Propuestes metodolóxiques nueves pa la enseñanza musical; Música y autoxestión dende les periferies: failo tu mesmu, failo meyor; Sync y Licensing musical: oportunidaes na industria audiovisual.
Amás, mañana remata’l plazu p‘apuntase a traviés d’esti enllaz a la presentación de propuestes pa los alcuentros comerciales (Xuntes) y les presentaciones curties (Rolda). Les presentaciones curties tán feches pa «captar l’interés de públicos estremaos, incluyendo asistentes al eventu, potenciales collaboradores, socios inversores, patrocinadores públicos…». Son ponencies de cinco minutos nes que pueden usase materiales d’apoyu y con elles náguase por que los y les ponentes «destaquen el valir artísticu, el potencial de mercáu y la capacidá de xenerar impactu cultural y económicu». Van escoyese un mínimu de 20 presentaciones, que van facese’l miércoles 9 y xueves 10 d’abril ente les 15:45 y les 16:45h y pa poder participar nelles hai qu’inscribise a traviés d’esti enllaz.
Per otru llau, les Xuntes son «alcuentros comerciales breves que s’entamen col enfotu de promover la conversación y l’asesoramientu ente asociaciones, empreses, artistes, programadores, xestores culturales, profesionales de la comunicación y managers pa favorecer la cooperación, l’intercambiu de conocimientos y el desendolcu de futures sinerxes dientro del sector«. Van facese’l miércoles 9 d’abril de 13h a 14h. Por último, quien quiera participar en cualquier actividá del eventu tien qu’inscribise nesti formulariu enantes del domingu 23 de marzu.
Suscríbite a les nuestres novedaes
