D’Urria actualicen güei’l so postreru llanzamientu, «De Fuentesila a Primóu», sumando-y tres nuevos temes. El grupu anuncia que van dir añadiendo nuevos llanzamientos a esi mesmu trabayu hasta terminar formando un discu completu. Súmense asina a una nueva dinámica de llanzamientos que va alexándose de la cronoloxía single-discu y s’avera más a ufiertar conteníu con mayor frecuencia, en dosis más pequeñes.
Falamos con «Sabu» sobro los nuevos temes. Cúntanos que «El Arriero» ye un romance recoyíu y popularizáu por Joaquín Díaz, del que ficieron una versión col estilu propiu del grupu.
«L’Amudar» ye un son ya un bail.le recoyíu en Trabáu (Degaña) por Ramsés Ilesies y Xosé Ambás a Arcides y María González. La versión que presenten inclúi un fragmentu d’un conciertu de D’Urria en Trabáu nel que cantó con ellos Rosa Rodríguez «Cunqueira», y faen el tema n’alcordanza d’ella.
Y «Lolas» ye una garrucha de «Las Lolas», pandereteres de Rabanal d’Arriba (L’Aviséu), en L.lión. Canta con ellos nesti tema Xabier Díaz, al que aprovechen pa agradece-y la collaboración. El tema entama cola voz de Carmen Álvarez, tamién de Rabanal d’Arriba.
Suscríbite a les nuestres novedaes
