Dempués d’asoleyar del manifiestu «Música n’asturianu SÍ», d’algamar en cinco díes 4.200 firmes verificaes y protagonizaes pol sector cultural en sofitu a esti testu y de presentar la moción al plenu del Ayuntamientu pa garantizar y promover la música n’asturianu y la llibertá d’espresión; toca’l siguiente pasu d’esta serie d’acciones que surdieron dende’l sector musical asturianu pa dar respuesta a les declaraciones de Sara Álvarez Rouco -conceyala de Festexos de Xixón, diputada na Xunta Xeneral y Vicepresidenta de Vox Asturias- nes que vulneró gravemente derechos culturales, llingüísticos, llaborales y de llibertá d’espresión. El próximu martes 1 d’agostu va debatise y, aprobase o non, nel plenu «la moción en defensa y promoción de la música y cultura n’asturianu en Gijón/Xixón».
Dende la iniciativa «Música n’asturianu SÍ» consideren qu’esta moción «ye mui fácilmente asumible por tolos grupos municipales que tán comprometíos col patrimoniu cultural asturianu inmaterial y material y colos derechos culturales, llingüísticos, llaborales y de llibertá d’espresión». Amás creen «qu’aprobar esti testu prácticamente a comienzu del mandatu municipal y a 3 díes de que vayan entamar les fiestes de Xixón, ye un mui bon exemplu p’amosar que Xixón ye una ciudá abierta, integradora y arguyosa de la so identidá y del so patrimoniu».
Durante esti tiempu David Varela y Xicu Ariza, en representación d’esta iniciativa, tuvieron dos reuniones colos grupos municipales; una’l xueves 20 de xunetu colos grupos que llevaron nel so programa electoral de 2023 dalguna cuestión favorable a la llingua y la cultura asturiana (Foro Asturias, FSA, IU-Convocatoria por Asturies y Podemos) y otra esti miércoles 26 con Ángela Pumariega del PP, un partíu políticu qu’aprobó en 1998 la Llei d’Usu y Promoción del Asturianu y que n’otres comunidaes autónomes como Galicia desarrolla una política cultural que califiquen de «amañosa». Tolos partíos políticos amosaron una bona predisposición n’aprobar esta moción y comprendieron la preocupación del sector cultural a raíz de les declaraciones d’Álvarez Rouco, de los pasaos 23 de xunu y 3 de xunetu. La moción preséntenla conxuntamente los grupos municipales de IU-Podemos-PSOE.
«Valoramos mui positivamente la posible aprobación d’esta moción, porque supón un reconocimientu per parte de la ciudá de Xixón hacia les persones, empreses y agrupaciones que trabayaron, trabayen y van siguir trabayando pola riqueza de la nuestra cultura autóctona y pol dinamismu social, cultural y económicu que xenera», opinen dende «Música n»asturianu SÍ». Amás consideren que’l compromisu de «non solo caltener, sinón aumentar en Xixón la programación d’actividaes y d’eventos en llingua asturiana, tanto los rellacionaos cola cultura tradicional como les creaciones culturales contemporánees; ye mui importante p’aumentar la incidencia social de la cultura asturiana. Porque cuanto más visible y conocíu socialmente seya esti patrimoniu cultural, meyor va protexese, conservase, valorase y tresmitise ente les xeneraciones venideres, amás d’ayudar a desarrollar una industria cultural que cree actividá y puestos de trabayu».
Suscríbite a les nuestres novedaes
