El Coru Minero de Turón cumple 75 años. En 1950 xubió per vez primera a un escenariu y nun paró de facelo gracies al compromisu de tolos sos integrantes, gran parte d’ellos mineros de la Cuenca del Caudal. Por esta razón esti domingu 2 de payares, a les 21.45h, va protagonizar el capítulu nuevu de Xuntanza, programa de TPA dedicáu a «celebrar la música al traviés de quienes la viven, la reinventen y la tresmiten».
Para repasar la historia del coru, van pasar pel sofá del programa dalgunos de los componentes más vieyos amás d’incorporaciones nueves. Xunto a ellos va tar la directora del coru, Rebeca Velasco, y van interpretar dalgunos de los temes más conocíos del so repertoriu como ‘Mocina, dame un besín’ o ‘Asturias’ de Víctor Manuel.
Como ye vezu en Xuntanza van participar y actuar otres formaciones. Nesti casu acompañen al coru Alfredo González, el Coru de Muyeres de San Esteban y integrantes del Coru Infantil de la Escuela Municipal de Música de Grao, que tamién dirixe Rebeca Velasco. Amás, actúen el guitarrista Emilio Ribera y el cantaor David Fernández y el Trío Llocántaru, formáu por Fernando Nuño, Fernando Entrialgo y Rebeca Velasco.
Suscríbite a les nuestres novedaes
