El pasáu domingu 11 de mayu la televisión pública asturiana estrenó la segunda temporada de Sonadía -el programa dedicáu a la música fecha n’Asturies que conducen les hermanes Alicia Álvarez y Mar Álvarez (Pauline en la Playa)- y Xuntanza, un programa nuevu «pa celebrar la música a traviés de quien la vive, la reinventa y la tresmite» nel que cada selmana conduz el programa una persona estremada venceyada a la escena asturiana.
Xuntanza yá tuvo presentáu por Pau Santirso -que convidó a Herbamora, Xosé Ambás, La Banda Latira, Pandereteros d’Anguaño, Xeitu y al gallegu Xurxo Fernandes-, y por Vicente Díaz, nun capítulu nel qu’andecharon con él Marina Carbajosa -ganadora del Premiu Obdulia Álvarez La Busdonga d’Asturianada-, Pepín Robles y Pipo Prendes, ente otros. Esti domingu a les 21.45h va guiar el programa Héctor Braga y les persones convidaes son les intérpretes d’asturianada Mariluz Cristóbal Caunedo, Alicia Villanueva, Chucha de Nembra, Lorena Corripio, Maribel González Morán, Jorge Tuya, Luis Estrada, y el gaiteru Valentín Fuente.
Per otru llau, per Sonadía yá pasaron representando a la música n’asturianu Muyeres que, tres de rematar la exitosa xira d’Humanes, ficieron una interpretación de ‘La Llobera’ en Villa María (Somió). Esti domingu a les 22.45h l’episodiu va tar dedicáu a solistes y, ente ellos, va apaecer Tasio, l’intérprete d’asturianada entemecida con electrónica.
Amás de na parrilla televisiva, RPA sigue emitiendo tolos sábados a les 22h Al Son el programa especializáu na música d’espresión asturiana que dirixe Xune Elipe y qu’anguaño va pela tercer temporada. Entrevistes, actualidá, collaboraciones y otres secciones dan forma a esti espaciu que nació en 2021.
Na semeya: Tasio con Alicia y Mar Álvarez nel Pozu San Luis
Suscríbite a les nuestres novedaes
