El pasáu xueves 30 d’ochobre presentóse nel Muséu del Pueblu d’Asturies la donación del fondu gráficu d’Ígor Medio. La buelga d’esti músicu y dibuxante que mos dexó de manera prematura va cuasi yá veinte años sigue tando bien marcada, y recuérdanos l’impactu que tuvo na cultura asturiana popular. Miembru fundador de Felpeyu, Ígor dedicó la otra metá de la so faceta artística al dibuxu y la ilustración. Ye bien conocíu el so trabayu cola tira La Familia Castañón, que s’espublizó completa va unos años. Nel fondu hai material orixinal, bocetos, debuxos, cartelos, caricatures… conformen un total de 1.300 obres.
Nel actu de presentación tuvo presente Sonia Tuya, madre d’Ígor, y intervinieron Arantza Margolles, con una emotiva «carta» dirixida a Ígor na que dialogaba sobre l’Asturies na qu’él vivió y so la situación actual d’esta tierra; Ángel de la Calle, reconocíu ilustrador que destacó la figura del dibuxante como «un parteaguas» na historia del cómic asturianu; Javier Rodríguez, dibuxante que compartió carrera, trabayu y amistá con Ígor; y Montserrat López Moro, conceyala de Cultura, Museos y Industries Creatives de Xixón.
Suscríbite a les nuestres novedaes
