Tapia conviértese esta selmana na capital celta del occidente asturianu gracies a la XXVIII edición del Festival Intercéltico d’Occidente, Fiesta d’Interés Turísticu que va enllenar esta villa de conciertos, esposiciones, mercáu, charres y talleres na Escuela Internacional de Música Folk y otres actividaes. Del 7 al 11 d’agostu la música n’asturianu va sonar con siete actuaciones: José Manuel Tejedor, La Garrapiella, Picarós, Entós, Les Caparines, Banda Gaites Soto Rei y Grupu Folclóricu Prau Llerón.
El bayurosu programa entama’l xueves 7 a les 19h col llevantamientu de la bandera celta nel ayuntamientu y la inauguración del Mercáu Celta. A les 20.30h, l’Auditoriu de Tapia va acoyer, con un preciu d’entrada de 5 euros, el conciertu de les pandereteres Como Cho Canto (Asturies) y Traspés (Galicia). La xornada remata a les 23h nel Puertu de Tapia con una «verbena tradicional» al cargu de la bandina La Garrapiella.
La mañana del vienres 8 el Puertu de Tapia y les agrupaciones tradicionales van ser les protagonistes. A les 12.30h actúa la Banda Gaites Soto Rei siguida de les formaciones gallegues Traspés y BG Nova Era. Pela tarde son Prau Llerón y BG Soto Rei quien va poner los sones asturianos nel Mercáu Celta dende les 20h. Los conciertos treslládense a les 23h a la Plaza Campogrande onde van actuar el tríu de folk de cámara Entós, la Charanga Traspés de Galicia y les pandereteres Les Caparines.
El sábadu 9 la cultura asturiana va tar representada otra vuelta con Prau Llerón -qu’actúen a les 20h nel Puertu de Tapia y nel Mercáu Celta- y colos conciertos de les once la nueche na Plaza de Campogrande nos que van tocar les formaciones folk José Manuel Tejedor y Picarós. El domingu 10 les distintes agrupaciones tradicionales convidaes nesti XXVIII FIDO van participar a les 12.15h nuna «Alborada del mar«, a les 13h nuna «Misa Folclórica» y a les 14h na recepción municipal nel Ayuntamientu y a les 19.30h van animar el Mercáu Celta. Pela nueche son les formaciones irlandeses y escoceses Lir School of Irish Dance, Norfolk y The Unprepared quien va poner son. L’eventu zárrase’l llunes 11 a les 14.30h cola baxada de la bandera celta.
El Festival Intercéltico d’Occidente vuelve a poner en marcha otru añu más la Escuela Internacional de Música Folk, una programación de charres y talleres pa que la xente interesao en delles cuestiones culturales de los países del Arcu Atlánticu puedan afondar nello. L’aula va ser itinerante, con actividaes repartíes ente la Plaza del Ayuntamientu, l’Auditoriu de Tapia y el salón de plenos del Ayuntamientu.
D’esta manera el xueves 7 a les 12h va haber un cursu de baille asturianu puesto por Ángel Ramón Herrera, en compañía del grupu de baille de l’Asociación Fraternidad; el vienres 8 a les 19.30h un taller de pandereta y panderu impartíu por Luis Ángel Fernández Santos; el sábadu 9 a les 13.15h un cursu de baille irlandés puestu pola Lir School of Irish Dance y a les 19.30h la conferencia «La danza en Galicia» de Diego Docabo; el domingu 10 a les 19.30h un averamientu a la música escocesa con The Unprepared; y el llunes 11 l’alderique «La muyer nel folclore del Arcu Atlánticu» moderáu por Martín Fernández Cascudo.
Suscríbite a les nuestres novedaes
