El Festival Intercélticu enllena Avilés de sones atlánticos hasta’l 31 de xunetu

Ente’l 23 y el 31 de xunetu’l Festival Intercélticu d’Avilés (FIA) celebra la so venticinco edición con una vuelta a los conciertos presenciales y a la normalidá; los responsables d’esti eventu veteranu, l’Asociación Cultural Esbardu, tienen entamao pa esti añu un programa bayurosu y variáu. Ente les actividaes programaes tán una esposición (Palaciu de Valdecarzana) na que van poder vese los cartelos de toles ediciones del festival (fechos por ilustradores como Miguel Solís Santos, Luis Taboada, Vitor González o Samuel Armas), una amuesa de fotografíes del mesmu y una esbilla de les camisetes que se sacaron a lo llargo de toos estos años; charres sobre la llucha celta; prebes de quesu y sidra; cancios de chigre; festival de tonada; mercáu; área de restauración o pasacáis.

La zona conocida como La Esposición (Les Meanes) vuelve a acoyer el Festival Intercélticu nun complexu onde s’asitien la carpa, l’escenariu, el mercáu, el chigre y la zona de restauración. A lo llargo de nueve xornaes Avilés conviértese na capital intercéltica d’Asturies con bien d’actos rellacionaos cola cultura y la música celta. Na presente edición van tar presentes delegaciones d’Asturies, Galicia, Escocia y Irlanda; con agrupaciones de baille como Scoil Rince Cualann, Airiños de Fene, Ximielga la Saya o Esbardu; o bandes de gaites como Strathaven Pipe Band, Lume de Biqueira o B. G. Corvera d’Asturies.

Conciertos de baldre y de pagu

Tocántenes a la música, los conciertos van principiar el sábadu 23, a les 22:00 h., con una Nueche en Danza protagonizada pola Bandina Turcipié  (cuartetu de música tradicional asturiana pensáu pal baille con gaita, acordión diatónicu, tambor y bombu) y los folcloristes Ambás y Ramsés (pandereta y voz); Argayu (domingu 24, 22:15 h.), grupu avilesín creáu nel 2018 a mediu camín ente’l folk-rock y el pop llariegu qu’interpreten versiones de pieces como «Pescadores», «La Romería», «Xixón del alma» o «Soi de Verdicio»; Guieldu (llunes 25, 22:15 h.), formación moza qu’esti añu asoleyaben el so primer Ep y que sigue los patrones clásicos de la Música Celta orixinaria de los años 80-90;  Deira, tríu astur-andaluz (flauta, violín y buzuqui) con muncha influyencia de la música escocesa qu’apocayá foron los ganadores del concursu ‘The Battle Of Folk Bands’ nel festival Celtic Connections de Glasgow; Ajo Band, liderada pol gaiteru Santiago Gutiérrez, quien fuere ún de los fundadores del grupu Trasgu, pioneru del folk asturianu, y qu’agora en formatu cuartetu sigui la estela del folk-rock; y Symbio, probablemente la que puede ser la sorpresa del festival, un dúu que se sal de la órbita celta y que centra la so música na tradición sueca, formáu por Lars Emil Öjeberget (acordión) y Johannes Geworkian (gaita rabil), el so soníou foi descritu como como una narración musical onde la música folklórica minimalista y la música dance electrónica conflúin y conviértense nuna esperiencia cinematográfica pal oyente, nel añu 2016 foron reconocíos como ‘Meyor Artista Revelación del Añu’ nos Premios de Música Popular y Mundial de Suecia. 

Otra manera, esta edición tien como novedá la incorporación de dos conciertos de pagu que van protagonizar otres tantes bandes veteranes como Luar na Lubre y Celtas Cortos. Los primeros van actuar el vienres 29 (22:15 h.), son tou un clásicu del folk y la Música Celta a nivel estatal; la banda gallega ta nesti momentu presentando en directo fundamentalmente los temes del so últimu trabayu, tituláu Vieiras e vierios. Historias de peregrinos, centráu nel Camín de Santiago, anque nun van faltar tampoco les pieces mítiques del so repertoriu. En cuantes a los vallisoletanos de Celtas Cortos (sábadu 30, 22:15 h.), son vieyos conocíos del públicu asturianu y en directo ufierten un soníu potente a mediu camín ente’l pop, el rock y el folk, con temes bien conocíos por un públicu mayoritariu. Pa estos dos conciertos, con aforu acutáu, les entraes pueden sacase al traviés de los enllaces https://entradium.com/events/luar-na-lubre-aviles y https://entradium.com/events/celtas-cortos.

Mercar discos folk na tienda online

Dexa un comentariu

X