El folclor vaqueiru protagoniza les Xornaes d’Estudiu del Aula Didáctica de Cultura Popular Asturiana

Dempués del parón del branu, vuelve l’actividá de l’Asociación Cultural Escontra’l Raigañu y la so Aula Didáctica de Cultura Popular Asturiana. Los díes 29 y 30 de setiembre el Centru Social de Llaranes (Avilés) va acoyer les Xornaes d’Estudiu El Folclor Vaqueiru: pasáu y presente, Na cita va haber conferencies, alderique, amuesa de sones, presentación de trabayos de campu y taller de práctica de baille y toque d’instrumentos tradicionales. Les xornaes tienen un preciu de 20 euros (15 pa socios/es) y pa asistir como públicu hai qu’apuntase enantes del 22 de setiembre escribiendo al corréu escontralraiganu@gmail.com.

«Los cambeos socioeconómicos produciíos na Baxa Edá Media dieron llugar a l’apaición d’un grupu dixebráu del restu de la sociedá. La so principal actividá yera’l cuidáu del ganáu vacunu alternando ente pastos d’iviernu y de branu. Yeren los vaqueiros». Despliquen Escontra’l Raigañu pa contestualizar estes xornaes. Amás, añaden qu’«esta condición fizo que nel sieglu XIX tuvieren arrodiaos d’una serie de mitos al respeutive del so orixe y les sos costumes» y que’l sieglu XX «foi ricu nel espardimientu del so folclor». Sicasí, consideren qu’«entá anguaño facémonos entrugues al rodiu de quién fueron y qué significa ser vaqueiru, al traviés de los sos bailles, moda, costumes y la realidá social contemporánea», y por eso organicen estes Xornaes d’Estudiu.

El vienres 29 entamen a les 19h con una conferencia de la doctora en historia y investigadora Fe Santoveña entitulada Los Vaqueiros d’Alzada. Mitos y costumes culturales, que va tar siguida a les 19.45h por un alderique nel qu’intervienen Fernando Rodríguez, recopilador y componente del desapecíu grupu Xurgar Nas Costumes de L.luarca; Ramsés Ilesies, historiador, músicu y docente de música y baille tradicional; José Antonio Gómez, profesor de la Universidá d’Uviéu y autor de trabayos sobre’l folclor; y L.luis Cristóbal Ardura, recopilador y componente del desapaecíu grupu Los Concetsones de Tinéu.

Trabayos de campu y amuesa

Pal sábadu 30 la programación entama a les 10.30h cola Visualización de trabayos de campu y aprendizaxe de repertoriu de bailles vaqueiros na que participen Fernando Rodríguez, María Álvarez. María Ortiz y Fe Santoveña. Dempués d’una posa pa xintar, a les 17h Rosa Fernández -profesora de pandereta y baille na Escuela de Música de Tinéu y excomponente de Los Concetsones y Muyeres- va facer una amuesa de La Payel.la como instrumentu d’acompañamientu rítmicu del repertoriu vaqueiru. N’acabando, Ramsés Ilesies va amosar los toques de percusión vaqueiros de 17h a 18h. Les xornaes rematen con una amuesa de sones vaqueiros a cargu de Mercedes Pérez Gayol, recopiladora y fundadora de Xurgar Nas Costumes.

Discos de música tradicional y folk a la venta na tienda