«El 20 de marzu aporta la primavera y yá sabemos que la primavera la sangre altera, y nuna primavera mio sangre s’alteró y d’esa alteración asoleyó Manual de Belleza y muerro por que lo sintáis. 20 de marzu en toles tiendes y en toles plataformes«. Con estes pallabres anunció Rodrigo Cuevas que nuna selmana va poder sentise y mercase’l so esperáu tercer trabayu.
Tres d’estrenar n’avientu’l cenciellu ‘Un mundo feliz‘, nel que collabora Massiel y col que l’axitador cultural presenta un mundu alternativu, muncho más llibre y prestosu; y dempués de llanzar el pasáu mes el curtiumetraxe musical Llagares, formáu polos temes ‘Sácame a baillar’ -cola collaboración d’Ana Belén-,‘Asturcón’ y ‘Una muerte ideal’ -na qu’andechen Mapi Quintana y el gallegu Grande Amore-; yá queda mui poco pa poder disfutar de tolos cantares nuevos de Rodrigo Cuevas.
Pel momentu nun hai más novedaes publicaes de Manual de Belleza, sacantes que la producción vuelve a tar fecha por Cuevas xunto a Eduardo Cabra, prestixosu productor y ex componente de Calle 13 que yá foi responsable d’esta xera nel anterior Manual de Romería. El 20 de marzu acaba la espera y con ella les ganes de sentir ún de los trabayaos alredor de los qu’hai más espectatives dientro y fuera del país.
La publicación del tercer discu del «Ministru de Verbenes» va tar siguía de la xira La Belleza que pel momentu va llevalu a Avilés, A Coruña, Barcelona, Donosti, León, Madrid, Cartagena, Valencia, Santander, Uviéu y Bilbao. El Pabellón de La Magdalena d’Avilés va acoyer al vienres 24 y sábadu 25 d’abril l’arranque del so espectáculu nuevu que se presenta como «una xira que va llevar la fantasía escénica y conceptual más increíble» de la trayectoria del axitador cultural.
Asina ye como esti recintu que tien un aforu de 4.500 persones, va convertise «nel llugar nel que los suaños y lo guapo fáinse terrenales«. D’esta manera l’entamu de La Belleza va ser la producción más importante que Rodrigo Cuevas y el so equipu ficiera hasta la fecha. La dirección escénica ta al cargu de Terrible Studio, la dirección musical ye de Víctor Martínez y nel equipu van trabayar los músicos y técnicos habituales.
Suscríbite a les nuestres novedaes
